«ӨНЕР – МЕНІҢ ӨМІРІМ»

Семейдің тарихи өлкетану музейінде Болат Сыбановты еске алу кеші өтті

Сәрсенбі, 24 қаңтар күні Семейдің облыстық тарихи өлкетану музейінде жерлесіміз, ҚР-ның еңбек сіңірген әртісі, әнші, сазгер Болат Сыбановты еске алу кеші өтті. «Өнер – менің өмірім» атты сан қырлы өнер иесінің 80 жылдығына арналған кешке жары, балалары, замандастары мен жерлестері және өнерсүйер қауым қатысты.

Биылғы жылдың 10 қаңтарында әнші, сазгер, театр әртісі Болат Сыбановтың туғанына 80 жыл толып отыр. 60 жыл ғұмырында өнерді өміріне айналдырған Болат Күнтуұлы 100-ден аса рөлді сомдап, 30-дан аса өлең жазған. Өзінің орындауындағы «Ақ бұлақ», «Таң самалы», «Ғашықтар термесі», «Жан ана», «Әке туралы» және басқа да өлеңдері қазақ радиосы мен теледидарының алтын қорына енген.

- Кешті ұйымдастырудағы мақсатымыз – жастарды Болат Сыбановтың шығармашылығымен таныстыру. Жас ұрпақ Болат Сыбановтың есімін көп біле бермейді. Болат Сыбановтың өмірден қайтқанына жиырма жыл уақыт болса да, біздің музей сазгер есімін ұмытқан емес. 60 және 70 жылдық мерейтойлары біздің музей қабырғасында аталып өткен болатын. Әлі күнге дейін қаламыздағы театр сахналарында ол кісінің әндері шырқалуда. Болат Күнтуұлын өз елінің нағыз патриоты болды. Бұған ақын өлеңдері куә. Ұлы Қанат Сыбанов та өнер жолын жалғастырып, әке есімін көпшілікке танытып жүр,- деді музей директоры міндетін атқарушы Ләззат Әлжан.

Өнердегі алғашқы еңбек жолын Алматы қаласындағы Абай атындағы филармониядан бастаған Болат Сыбанов кейіннен Семейге келіп, 1957 жылы Семей облыстық музыкалық - драма театрына қабылданған. 40 жылдан артық театр саласында еңбек еткен ол ешқандай музыкалық білімі болмаса да фортепиано, баян, домбыра сынды аспаптарды шебер ойнаған.

- Егер тірі болса, биыл сексенге толар еді. Халқы, елі ұмытпай осындай шараларды өткізіп жатқанына қуаныштымыз. Болат өз елін, жерін, халқын жоғары бағалап, ардақтайтын. Алматыға шақырса да бармай, Семейде қалды. Ол кісінің Семейге сіңірген еңбегі көп. Біз бірге 30 жылдан артық өмір сүріп, бала-шағамыздың қызығын көрдік. Жанымда болса, биыл ұлан асыр той жасар едік,- дейді жары Үміт Сыбанова.

Кеш барысында өнер көрсеткен Абай атындағы қазақ музыкалы-драма театрының әртістері заманында бірталай басты рөлдерді сомдаған Болат ағаның актерлік шеберлігін де жоғары бағалады. Бір қазақтың емес, бар қазақтың әншісі атанған Болат ағаның көптеген әндері Түркия, Швеция, Моңғолия, Германия, Қытай елдерінде кеңінен танымал.

Жадыра ТӨЛЕГЕНҚЫЗЫ

РОЗА РЫМБАЕВА ТУҒАН ЖЕРІНДЕ

Жарма ауданы батырлар мен ақындар мекені деп бекер айтылмаса керек. Киелі өлкенің өнер саласында алған еншісі де аз емес.  Тарихы тамырланған мекеннің тағы бір дара перзенті – әлемді алтын дауысымен мойындатып, Орта Азияның бұлбұлы атанған Роза Қуанышқызы Рымбаева. Өнердің заңғар шыңын бағындырған Жарманың Розасы мерейлі туған күнін  жерлестерімен бірге атап өтіп, аудан орталығындағы Мәдениет үйінде ән кешін өткізді.

Өнер айдынында есімі алтын әріппен жазылған жерлесіміз 1957 жылы Жарма ауданына қарасты Жаңғызтөбе станциясының 9-шы темір жол айырығында дүниеге келген. Өнерге деген сүйіспеншілігінің арқасында танымал болып, республикалық «Гүлдер» жастар эстрадалық ансамблінің, «Қазақконцерт» бірлестігі жанындағы «Арай» эстрадалық ансамблінің әншісі болған Роза Қуанышқызы Жармалықтардың ғана емес, дүйім қазақ елінің  мақтанышына айналды. Әнші қызымыздың әлемге танылуына С.Бәйтерековтің «Әлия» әні себепкер болды. Қаршадай қыз өзінің ерекше дарынымен қазақты жер жүзіне  танытты. Оның орындауындағы Т.Ерешевтің «Гүлдене бер, туған жер!», Н. Тілендиевтің «Куә бол», Б. Байқадамовтың «Айгөлек», Ж.Тұяқбаевтың «Атамекен», Т.Сарыбаевтың «Отандастар» сынды әндері тыңдармандар жүрегіне бірден жол тапты. Оның орындауындағы әрбір әннен Отанға, туған жерге деген ыстық ықыластың лебі сезіліп тұрды. «Бір бала», «Сәулем-ай», «Кебек», «Назқоңыр», «Әгугай» және тағы басқа да халық әндерін ол өзіндік ерекшелікпен орындап, репертуарына, ТМД елдерімен қатар, шетел халықтарының әндерін де енгізді. Сондай-ақ ол «Қош бол, Медеу» фильміне де түсіп, киноактриса ретінде де танылды.

1977 жылы Болгарияда өткен эстрада әртістерінің дәстүрлі халықаралық конкурсында бас бәйге — «Алтын Орфей» жүлдесін жеңіп алып, қазақ елінің абыройын асқақтатты. Түрлі халықаралық байқауларды бағындырған Розаның мәртебесімен бірге Жарма өңірінің де абыройы арта берді.

Роза Қуанышқызы жерлестерін еш ұмыт қалдырған емес. Тынымсыз еңбек пен қиындығы мол өнер жолында жүрсе де уақыт тауып, туған жеріне ерекше көңіл бөліп отырады. 2009 жылы аудан орталығына арнайы келген ҚР-ның халық әртісі Роза Қуанышқызы әнші Құдайберген Бекіш, күйші Айгүл Үлкенбаевалармен бірге үлкен концерттік бағдарламасын ұсынып, халқына, туған жеріне деген сағынышының орнын толтырып, жер-лестерінің ықыласына бөленген-ді. Сол сияқты «Туған ел - алтын бесігім» акциясы аясында облыс орталығында Жарма ауданы күніне орай өткен гала-концертте жерлестерінің шашбауын көтеріп, жиылған қауымға әннен шашу шашты, осылайша туған жерінің мәртебесін арттырды.

Роза Қуанышқызының өз мерейтойын жерлестерімен бірге атап өтуі жармалықтар үшін үлкен құрмет пен мәртебе болды. Концерт шымылдығын ашқан өнер иесі Жармаға деген ыстық сезімі еш уақытта өшпейтіндігін жеткізді.

- Біздің басты байлығымыз Сіздерсіздер, құрметті көрерменім, тыңдармандарым. Туған өлкесінің түлегенін, көріктеніп, гүлденгенін кім қаламасын! Туып-өскен Жармамның, Семейімнің бүгінде өзгеріп, ерекшеленіп келе жатқандығына қуаныштымын. Жармада тудым, осында өстім, жетілдім. Ал Семейде білім алдым, Мұқан Төлебаев атындағы өнер ордасынан түлеп ұшып, өнерге құлаш сермедім. Жүрген жерімде туған өлкемді әр кез мақтан тұтамын. Ауданымыз да алға басқан істер көп екен. Өңірде өнерге ерекше қолдау барына көз жеткізіп отырмын. Ал осынау ерек-ше күнді жерлестеріммен бірге өткізу - мен үшін үлкен мәртебе және бұл ыстық қауышу менің есімде сақталып қалады. Тағы бір он жылдан кейін осындай кездесуде бас қосайық, соған жазсын деп тілеймін,- деген Роза Қуанышқызы  кіші отанына сағынышын «Атамекен» әнімен жеткізді.

Екі сағатқа созылған концертте жерлесіміз жанды дауыстағы әсем әуенімен тыңдарманның құлақ құрышын қандырды. Әншінің жеке төлқұжатындай болып кеткен «Әлия» әні шырқалғанда, тебіренбеген жан қалмады.

Кеш барысында өнер иесі өткенге көз жүгіртіп, өмір жолынан сыр шертіп, әрбір адам үшін суын ішіп, топырағынан нәр алған туған жерінен артық әрі бағалы ештеңе жоқ екендігін атап өтті. Бұл - патриоттық тәрбие берудің, өскелең ұрпақтың туған жерге деген сүйіспеншілігін арттырудың бірден-бір жолы.

Туған өлкесінің туын тік ұстап, абыройын асқақтатып жүрген әнші қыздың елеулі еңбегі ескерусіз қалмады. Жиылған көптің алдында сахнаға көтерілген аудан әкімі Нұрлан Сыдықов халық әртісіне «Жарма ауданының Құрметті азаматы» атағын салтанатты түрде табыс етті.

- Роза жерлесіміз - тек Жарманың ғана перзенті емес, жалпы қазақ елінің маңдайына біткен жарық жұлдыз. Әлемді мойындатқан үлкен өнер иесі осынау ерекше күні жерлестеріне арнап концерт өткізіп отыр, жармалықтар үшін бұдан артық құрмет жоқ деп білемін,- деді аудан басшысы өз сөзінде.

Ауданның аға буын өкілдері атынан Айтқазы Мұсағитов нағыз өнер иесін жер-лестері мақтан ететіндігін, әлі де мақтана беретіндігін айтып, ағалық ақ батасын берді.

Ал осынау кеште Роза Қуанышқызына ұсынылған гүл шоқтары мен айтылған құттықтауларда шек жоқ.- Жерлесіміз келді деп шашбауымды көтеріп, кешіме келгендеріңізге қуаныштымын. Көрсетіп жатқан құрмет-теріңізге рақметімді айтамын. Менің өнер жолында жүргеніме биыл 42 жыл толып отыр. Жауапкершілігі мен ауыртпашылығы мол кәсіпті игеріп, биігін бағындыруда Сіздердің ыстық ықыластарыңыз бен қолдауларыңызды сезіндім. Сол себепті Сіздерге алғысым шексіз,- деді әнші өнер кешін қорытындылай отырып.

ӨНЕР БАРДА, ТҰРСЫНҒАЗЫНЫҢ ЕСІМІ ӨШПЕЙДІ

Семейде әнші, композитор Тұр-сынғазы Рахимов атындағы «Сәби болғым келеді» атты халықаралық конкурс өтті. Қазақстанның әр түкпірінен жиналған өнерпаздармен қатар, Моңғолия, Қырғызстан, Қытай мемлекеттерінен келген дәстүрлі ән орындаушылар да байқауда бақ сынады.

Тұрсынғазы Рахимов атындағы конкурс екі күнге созылды. Оған қазақтың қара домбырасын өзіне серік еткен 32 өнерпаз қатысты. Халықаралық дәрежеде өткен дәстүрлі ән орындаушылар конкурсы Семейде алғаш рет ұйымдастырылып отырғанын  айта кеткен жөн. Байқау шартына сай, өнерпаздар сазгердің екі әнін және бір халық әнін құлақ бұрауын келтіре орындауы шарт.

- Шығыс өңірінде қазақтың дәстүрлі ән өнерін сақтап қалу мақсатында осы байқауды ұйымдастырып отырмыз. Қазір, эстрада жанрын айтпағанда, қазақтың дәстүрлі әндері де шетелге ойысып жатыр. Сондықтан қазақтың дәстүрлі әндерін Тұрсынғазы Рахимов арқылы халық жүрегіне жеткізуді мақсат тұттық. Өткен жылы Тұрсынғазы Рахимов атындағы фестиваль ұйымдастырылған еді. Биылғы байқауды сол бастаманың жалғасы деуге болады. Байқауды алдағы уақытта тек Семей қаласында ғана емес, Қазақстанның өзге қалаларында да ұйымдастыруды жоспарлап отырмыз,- дейді Шығыс Қазақстан облыстық Әміре Қашаубаев атындағы филармония директоры Адай Азаматов.

ҚР-ның мәдениет қайраткері Толғанбай Сембаев, ҚР-ның еңбек сіңірген әртісі, «Құрмет» орденінің иегері Рамазан Стамғазиев, ҚР-ның еңбек сіңірген қайраткері, Қазақстан Жастар одағы сыйлығының лауреаты Алмасбек Алматов, ҚР-ның еңбек сіңірген әртісі, «Құрмет» орденінің иегері Бақыт Үдербаева, ҚР-ның еңбек сіңірген қайраткері Едіге Жүдібаров, ҚР-ның мәдениет қайраткері Әділ Тұрғанбай және ҚР-ның мәдениет қайраткері, «Құрмет» орденінің иегері Нұрлан Көшеров байқауға қазылық етіп, кіл мықтыларды анықтады.

Байқау қорытындысына сай, бас жүлдеге алматылық Нариман Абдрахманов ие болды. Төлеген Шәкәрімов, Ермек Нұрлытау, Дәуренбек Сләмғали, Өзгеріс Серікбай (Моңғолия),  Жасұлан Сақаев жүлделі үшінші және екінші орындарға лайық деп танылды. Ұлытау өңірінің тумасы, «Алтын жүрек» сыйлығының иегері, меценат Бекзат Алтынбектің 100 мың теңгені құрайтын арнайы жүлдесі де өз иелерін тапты.  ҚР-ның еңбек сіңірген әртісі Ғалым Мұхамединов атындағы жүлде Ғибадат Тұрғалиевқа, Айбала Бейсеноваға, Ерғазы Рахимов атындағы арнайы жүлде Гүлмира Шәбиеваға (Қырғызстан), Жүсіпбек Елебеков атындағы арнайы жүлде Алтын Сымасейітоваға, Мұқағали Мақатаев атындағы арнайы жүлде Еламан Құжимановқа табысталды.

Байқауға қазылық еткен халықтың сүйікті әншісі Рамазан Стамғазиев конкурстың жоғары деңгейде ұйымдастырылғанын айтады:

- Халықаралық байқау статусын алғандықтан, байқаудың жоғары деңгейде ұйымдастырылғаны көрініп тұр. Қатысушылардың жартысынан көбі өзіміздің шәкірттеріміз. Құрманғазы атындағы Қазақ ұлттық консерваториясын тамамдап, үлкен сахнада ащы тері алынған, біраз байқаулардың жүлдесін қанжығасына байлаған жастар. Бізді қуантатыны – жастардың, халық әнінен бөлек, Тұрсынғазы Рахимовтың шығармашылығына бой ұруы. Ол кісінің осы күнге дейін жинақтап, халқына аманаттап кеткен барлық әндерін шашауын шығармай, шаң жуытпай, орындалу стилімен, жасалынған трактовкаларымен  әрбір әннің бірнеше нұсқасын шама – шарқылары жеткенше орындап шықты. Әншілердің дауыс мүмкіндіктері мен осы күнге дейін жинақтаған тәжірибелерін шамаладық. Жастардың қазақтың қара домбырасын құшақтап алыс-жақын шетелдерден, еліміздің өзге қалаларынан келіп жатқаны, әрине, бізді марқайтады. Байқау барысында жас буынның  аға буынмен бір сапта тұруға жарап қалғандығын да көріп отырмыз. Жеңімпазды анықтауда әншінің әнді меңгеруі, тіл тазалығы, дауыс тазалығы, дауыс диапазоны, домбыра тарту техникасы, актерлік шеберлігі, білімділігі, әнді халыққа жеткізуі, сахнада өзін-өзі ұстауы - бәрі-бәрі бағаланды. Әннің туы тігілген киелі өңірден бастау алған шараға құтты болсын айтқым келеді. Байқау осы күйінде қалып қоймай, екі жылда бір рет өтіп тұрса, нұр үстіне нұр болар еді,- деген Рамазан Стамғазиев Тұрсынғазы аға айтқан әңгімелерді жинақтап, шағын кітап етіп шығарса деген ұсыныс айтады.

-Тұрсынғазы ағаны білетін кез келген адаммен сөйлессек, ол кісі жайлы қызықты әңгімелер айтады. «Тұрсынғазы деген екен» деген мәліметтердің барлығын жиыстырып, шағын кітап етіп шығарса артық болмас еді деп ойлаймын. Қазір жоғары оқу орындарында Тұрсынғазы Рахимовтың шығармашылығы ғылыми жұмыстардың тақырыбына арқау болып отыр. Демек, артында ұрпағы барда, сүйер елі барда, Тұрсынғазы Рахимовтың шығармашылығы жоғалмақ емес,- дейді әнші. 

Байқау барысында Еркін Шүкіманов пен Толғанбай Сембаевтың авторлығымен шыққан Тұрсынғазы Рахимовтың өмірі мен шығармашылығына арналған «Сағынбасқа не шара?» атты жаңа кітаптың тұсаукесері өтіп, қалың оқырманға жол тартты.  Осылайша, Тұрсынғазы Рахимов атындағы алғашқы халықаралық байқау өз деңгейінде өтіп, дәстүрлі ән шеберлері халықтың құлақ құрышын қандырды.

Жадыра ТӨЛЕГЕНҚЫЗЫ

ЕРТЕГІЛЕР ӘЛЕМІНЕ САЯХАТ ЖАСАҒЫҢЫЗ КЕЛСЕ - ЕРТЕГІ ҮЙГЕ БАРЫҢЫЗ

Жаңа жыл - ертегілер елінен келген ең қызықты, ең қуанышты, ерекше мереке. Үлкен-кіші келген жылдың иесі кім екендігін еске алғанда, ең бірінші, ерте заманда орман ішінде хайуанаттардың жыл басы болуға таласуы жайлы ертегі ойға оралары сөзсіз. Бұл күні Жер шарын ертегі аралайды. Аяз ата мен Ақшақарды үлкен-кіші асыға күтеді. Жаңа жыл қарсаңында біз де бір сәт балалық шаққа саяхат жасап, ертегілер еліне барып қайтқан едік. Түсінбей қалдыңыз ба? Театр емес, балалар ойнайтын аттракциондар орталығы да емес... Семейдегі көпшілікке таныс «Ертегі үйі»...

Қаланың шеткерірек бөлігіндегі Глазковтардың «Ертегілер үйі» баршаға таныс. Ағаштан түйін түйетін шебер Александр Глазков осыдан 35 жылдай уақыт бұрын өзінің үйін ертегі кейіпкерлерімен безендіруді қолға алған болатын. Өмір бойы ағаш шебері болып жұмыс істеген үй иесі зейнет демалысына шыққан соң 25 жыл бойы осы өнер туындысын толықтырып отырған. Әрине, зейнеткер зейнетақысының басым бөлігін түрлі түсті бояулар сатып алуға жұмсағандығы белгілі. Өзі дүниеден өткеннен кейін, әйелі Матрена Ивановна Глазкова, 2014 жылы 87 жасында дүниеден өткенше, ғажайып үйдің сәніне шаң жұқтырмауға  тырысқан. Ал Матрена әжей бақилық болғаннан бергі екі жылдай уақыттан бері ертегі үйге жанұяның досы Владимир Васильев иелік етіп келеді. Бүгінгі үй иесі бұрын да қарттарға қамқорлық жасап, осы үйдің көркемдігін сақтау ісіне қолғабыс еткен екен.

 - Жыл сайын жаз мезгілінде үй төбесінде отырған ертегі кейіпкерлерін алып, тазартып, бояймын. Әрине, бояуға қаржы көп кетеді. Дегенмен үйді халықтың келіп тамашалайтынын көргенде шыққан шығынға өкінбеймін. Керісінше, адамдардың көзін қуантып, көңілін көтеретін «Ертегілер әлемін» сақтап отырғаныма қуанамын. Осы туындыны дүниеге әкелген шебер досыма, көзі тірісінде, сақтап тұрамын деп уәде бергенмін,- дейді Владимир. Орыс халқының ертегі кейіпкерлері үйдің қақпасынан бастап  шатырына дейін түгелдей орын алған. Кейіпкерлер арасында келіп қалған жыл иесі

Әтешті де кездестірдік. «Мен жыл иесімін, ерте тұрып, таң атты деп хабар беремін!»- деп тұрғандай. Егер осы ғажайыпты көргіңіз келсе, Семейге келіңіз.

Burkit.kz

ИМАНҒАЛИ ТАСМАҒАНБЕТОВ СТУДЕНТТІК ШАҚТАҒЫ ГИТАРАСЫН СЫЙЛАҒАН ӘНШІ СЕМЕЙДЕ ТҰРАДЫ

Саяси сахнада жүріп барша халыққа сүйкімді қалпын сақтап қалу екінің бірінің еншісіне бұйыра бермейтіндігі белгілі. Қазақстандық саясаткерлер арасында хан да, қараша да құрмет тұтатын тұлғалардың бірегейі, ұлтжанды азамат Иманғали Нұрғалиұлының басқа қасиеттері өз алдына, өнер адамдарына әрдайым қолдау көрсетіп жүретіндігі жайлы да ел аузында жиі айтылады. Бәлкім, ол өзінің де өнерге бір табан жақындығынан  болар... Жастық шағынан әнге жаны жақын Иманғали Тасмағанбетов студенттік шақтағы гитарасын осыдан 20 жылдай уақыт бұрын семейлік әншіге сыйға тартқан екен.

 Республика көлеміне танылмаса да, Семейде өнерімен аты шыққан, ойын-тойларда ән айтып, патша көңіл тыңдарманының ықыласына бөленіп жүрген Қарлығаш Әлімбекованың өзі ҚР Премьер-министрінің орынбасары Иманғали Тасмағанбетовтің студенттік шақтағы гитарасын сыйлыққа қалай алғанын былайша әңгімелейді:

  -1995 жылы, Абайдың туғанына 150 жыл толуына арналған мерейтойды өткізуге қызу дайындық жүріп жатқан кезде, Семейге  мәртебелі қонақтар жиі келетін. Сол кезде Ұлы ақынның тойын өткізу жөніндегі Мемлекеттік комиссияның төрағасы ҚР Премьер-министрінің орынбасары   Иманғали Нұрғалиұлы  Тасмағанбетов болған еді. Қаламызға келген қонақтарға ән айтып беру үшін  әкімдіктің қызметкерлері шақыратын өнерпаздардың  қатарында жүрсем де,  ол кезде өзімнің аспабым жоқ еді. Мәртебелі меймандарға ән айтып беруге шақырылған кезде асығыс жиналып,  көрші пәтердегі мектеп оқушысының гитарасын алып жетіп бардым. Барғанда ғана байқадым, гитараның алдыңғы бетінде «Ну, погоди!» мультфильмінің кейіпкері қасқырдың суреті қаламсаппен үлкен етіп  ойып тұрып салыныпты. Дәл сол жерде жедел ауыстыра қоюға мүмкіндік болмағандықтан, мультфильм кейіпкері бейнеленген гитарамен Иманғали Тасмағанбетовтің алдында ән айтуға тура келді. Лұқпан Жолдасовтың репертуарындағы «Сен жүрген жермен жүргім келеді» атты әнді орындап шықтым.  Мәртебелі мейман   өнеріме тәнті болғандай! Тек жанында отырған сол кездегі облыс басшысы Ғалымжан Жақияновқа:

-  Әні жақсы екен, Қарлығашқа дұрыс гитара тауып бере алмадыңдар ма?- деді.

Мен жұлып алғандай:

 - Көршімнен сұрап алдым. Өзімнің гитарам жоқ еді...- дедім.

Сәл жымиып қойған Иманғали Нұрғалиұлы мені  шақырып жанына отырғызды да, қолымдағы гитараны алып бірнеше ән орындады. Дауысы тамаша екен. Үлкен лауазым иесінің қарапайымдылығы таң қалдырды. Қасында отырған облыс әкіміне:

 - Мен Қарлығашқа өзімнің студент кезімдегі гитарамды беріп жіберейінші,- дегені есімде. Әннен кейінгі әсермен жай ғана айтыла салған сөз болар.  Республикалық деңгейдегі үлкен басшының аймақтағы бір әншіге гитарасын беріп жіберуі мүмкін емес деп ойладым. Сонымен, дүркіреп Абай атамыздың да тойы өтті. Іс-шарадан кейін тойды өткізуге белсене қатысқандарды марапаттау шарасы өтетін болып, әкімдікке мен де шақырылдым. Облыс басшысы бір топ адамға мемлекеттік наградаларды және өз тарапынан алғыс хаттар беріп жатты. Бір кезде менің атым аталып, Иманғали Тасмағанбетовтің сәлемдемесі - студенттік шақтағы гитарасын көпшілік алдында тапсырды. Қатты толқыдым. Мемлекет қайраткерінің алыс аймақта жатқан қарапайым әншіге берген уәдесін ұмытпағандығы таң қалдырды. Одан бері де 20 жылдан артық уақыт өтті. Сол гитарамен халық алдында талай жаңа әндерді шырқадым. 2001 жылы Семей ядролық полигонының жабылғанына 10 жыл толуы құрметіне халықаралық форум өтетін болды. Қаладағы Түйемойнақ аралында «Өлімнен де күшті» монументі салынып, осы іс-шараға қатысуға келгенде,  Иманғали Нұрғалиұлымен қайта жүздесудің тағы бір сәті түсті. Аралға тігілген киіз үйге келген қонақтар алдында ән айтуға шақырылдым. Өзі сыйға тартқан гитарамен кіріп барғанда, арада алты жыл уақыт өтіп кетсе де, Иманғали Тасмағанбетов мені бірден таныды:

 - Қарлығаштың гитарасы тозып кетіпті. Жаңа гитара сыйлау керек екен,- деген Иманғали Нұрғалиұлы  сол жолы да студенттік шақтағы гитарасын менің қолымнан алып, бір сәт үнсіз қалғанын көргенде, жастық шақтағы досымен қауышқандай толқығандығын байқадым. Содан кейін студенттік шақтағы «ескі досын» баппен шерте отырып тағы да ән айтты. Қандай ән дейсіздер ғой? Булат Окуджаваның «Виноградная косточка» әні. Құлаққа жағымды қоңыр дауыс халыққа танымал үлкен саясаткердің қарапайымдылығын тіпті ажарландырып жіберген еді. Қазір заманауи мүмкіндіктерге бейімделіп, әнді гитарамен сирек айтатын болдық. Дегенмен Иманғали Нұрғалиұлын көгілдір экраннан көрген сайын туысымды көргендей қуанып, көзімнің қарашығындай сақтап жүрген сол гитараны қолыма қайта аламын,- дейді Қарлығаш.

Қарлығаш Әлімбекова - белгілі шежіреші, Қазақстанның Тұңғыш Президенті  Н.Ә Назарбаевқа халық атынан салтанатты жағдайда ақ бата берген  марқұм Шәкір Әбеновтің шөбересі.

                                                                                                                   Риза Молдашева

                                                                                                                    BURKIT.KZ

 

 

 

Меншік иесі: «Семей таңы – Вести Семей газеттері» ЖШС

Техникалық директор:Қайрат Жолобаев

Бас редактор: Ерзат Жанатұлы

           

Ескерту! Кез келген

материалды көшіру және жариялау

үшін редакцияның арнайы

рұқсатын алу қажет!

 

Телефон: 8-775-746-46-70,

8-707-372-57-00

Кеңсе тел.: 8-7222-52-36-57