ҚАЛАНЫ КӨРКЕЙТУ - ОРТАҚ ЖАУАПКЕРШІЛІК

Қаламызда мемлекеттік құрылыс нормаларын, ережелері мен талаптарын бұзып, заңсыз салынған құрылыс нысандарын анықтау, түсіндіру, алдын алу жұмыстары жүргізілуде. Осыған орай құрамы қалалық сәулет және қала құрылысы, жер қатынастары, кәсіпкерлік, ТҮКШ және тұрғын үй инспекциясы, жұмыспен қамту және әлеуметтік бағдарламалар бөлімі мамандарынан және учаскелік полиция инспекторларынан тұратын арнайы жұмыс тобы да құрылды.

Осы жұмыс тобы 11 маусым күні БАҚ өкілдерімен бірге Қайым Мұхамедханов, Шмидт көшелерінен Морозов көшесіне дейінгі аралықтағы сауда нысандарын аралады.

- Қаламызда тұрғындардың игілігі үшін қазіргі жүргізіліп жатқан абаттандыру мен көгалдандыру жұмыстары аясында тұрғын үй құрылыстары салынып, жолдар жөнделіп жатыр. Облыс және қала әкімінің тапсырмасы бойынша жұмыс істеп жатқан бөлшек сауда жасайтын дүңгіршектер мен павильондарды, тұрғын үйлердің бірінші қабаттарында орналасқан халыққа тұрмыстық қызмет көрсететін дүкен, офис, дәріхана сынды нысандарды тәртіпке келтірмекпіз. Бұл орайда осы нысандардың иелері дер уағында ағымдағы жөндеу жұмыстарын жүргізді ме, өз қарауындағы аумақтың тазалығын сақтап отыр ма, міне, осының бәрін тексеріп білеміз. Дегенмен қазіргі уақытта жекенің қарауындағы көптеген нысандардың ахуалы тіптен сын көтермейтінін несіне жасырып, жабамыз. Бірінші қабатта орналасқан коммерциялық нысандарда ең қарапайым жайт - мүгедек жандардың кіріп-шығуы мүлдем ескерілмеген. Бұл бір жолғы жазалау іс-шарасы емес, керісінше, біз кәсіпкерлерді құлағдар етіп, не істеу керек екенін түсіндіреміз. Бұдан кейін жағдайлары мәз емес дүңгіршектер мен павильондардың жұмыс істеуін мүлдем тоқтатамыз. Бүгін тек түсіндіру жұмыстары жүргізіледі. Егер өрескел заң бұзушылық орын ала қалса, онда қолданыстағы заң аясында әкімшілік хаттама толтырамыз. Мұндай рейд қала келбетін ажарландыруда үлкен рөл атқарады,- дейді Семей қаласының сәулет және қала құрылысы бөлімінің басшысы Бақтияр Сәлімов.
Рейд барысында Қайым Мұхамедханов көшесі бойында кәсіпкердің өз қаражаты есебінен салынып жатқан, салынған, жұмыс істеп тұрған нысандарға жұмыс тобы тарапынан талдау жүргізілді. Кәсіпкерлік нысан иелеріне, Қазақстан Республикасының Әкімшілік құқық бұзушылық туралы кодексінің 316, 319-баптарына сәйкес, объектілерді жобалау құжаттамасынсыз салғаны үшін айыппұл көзделгені туралы, құрылысты рәсімдеу тәртібі жайлы түсіндіріліп, жаднама берілді.
Жұмыс тобы ең әуелі «Космос» бизнес орталығында болды. Одан кейін тұрғын үйдің бірінші қабатында жаңадан салынып жатқан «Тами» дүкенінің иесімен жолықты.
- Мұндай рейдтердің өтіп тұрғаны жақсы, әрине. Бірақ өте аз өтеді. Біз қаламыздың абаттанғанын, жасыл желекке оранғанын қалаймыз. Өз ісімізді жаңадан ашып, құрылыс жұмыстарын енді-енді бастаған шақта, тұрғындар мен тиісті органдар тарапынан бірде орынды, енді бірде орынсыз талаптар туындайды. Жаңа құрылыс салушылар қаланың көркін кіргізетін абаттандыру жұмысын жүргізіп және көше шамдарын орнатуды да ескеруі керек. Белгілі бір аумақты жеке ісіңе пайдаландың ба, өзгенің де жағдайын ойлауға тиіссің. Міне, сондықтан осындай рейдтердің тұрақты жүргізілгені жақсы болар еді. Мұндай тексерулер жиі болып тұрғанын қолдаймын,- дейді жеке кәсіпкер Александр Макаров.
Кәсіпкерлер құрылыс бастарда өзім білемдікке салынбай, тұрғындардың жағдайын ескеріп, өзінің жобалық-сметалық құжаттамасын заң аясында жоспарлап, тиісті орындарға бекітіп алғаны ләзім екенін осы жолы «Тами» дүкенінің иесі Александр Макаров та нақтылай түсті.
Атқарылған жұмыстың нәтижесінде заң бұзушылыққа жол берген тұлғаларға Әкімшілік құқық бұзушылық кодексінде белгіленген шараларды қолдану мақсатында әуелі түсіндіру жұмыстары жүргізіліп, нәтиже шықпаса, облыстық Мемлекеттік сәулет-құрылыс бақылау басқармасына хатпен мәліметтер жолданып, тиісті шаралар қабылданады.
Енді бұдан былай кәсіп иелері өздеріне тиісті органдар тарапынан жасалған ескертуден қорытынды шығармаған жағдайда, қала көлемінде мемлекеттік құрылыс нормаларын, ережелері мен талаптарын бұзып салынған заңсыз құрылыстар жойылатын болады.
Осы жолы тағы бір мәлім болған жайт - құрылыс заңдылығының орындалу деңгейі бүгінде Семей қаласы бойынша артып келеді. Өйткені заңдастыруды кейінге шегеріп, қайтсем де табыс табамын деп, рұқсатсыз құрылыс жүргізетіндер пайда орнына өздері шығындалатыны дау тудырмайтын ақиқатқа айналып отыр. Бір кездердегідей әуелі салып аламын, содан кейін айыппұлын төлеп, заңдастырып аламын деушілерге ендігі жерде мықты тосқауыл бар. Білместіктен немесе білгісі келмегендіктен белгіленбеген жерге сауда нүктесін орналастыру сияқты жөнсіздіктер әлі де қылаң береді. Бірақ заңды білмеу жауапкершіліктен еш босатпайды. Сондықтан әр кәсіпкер өз ісін бастамас бұрын алдымен оның заңдылығын қамдап алмаса болмайды.

Серік ӘБІЛҚАСЫМҰЛЫ

ҚАУІПСІЗДІКТІ САҚТАУ БАСТЫ НАЗАРДА

Суға шомылу маусымының басталуына орай, Семей қалалық Төтенше жағдайлар басқармасы 12 маусым күні БАҚ өкілдерімен баспасөз мәслихатын өткізді. БАҚ өкілдерімен кездесу барысында қалалық Төтенше жағдайлар басқармасының басшылығы жазғы суға түсу маусымы, өрт қауіпсіздігі жайында жан-жақты сөз қозғады.

Баспасөз мәслихатында азаматтық қорғаныс және төтенше жағдайлар бөлімінің бастығы Марат Дәулетин өткен жылы суға шомылу маусымында 7 адамның суға кеткенін атап өтті. Ал биылғы суға түсу маусымы басталар – басталмастан екі адам суға кетіп үлгерген. Оның бірі Жезкент кентінің тұрғыны болса, екінші адамның кім екені анықталу үстінде. 

Марат Дәулетин шомылу маусымы басталмас бұрын барлық білім ордаларында түсіндіру жұмыстары жүргізіліп, ата-аналар мен балалардың құлағдар болғанын, қазақ және орыс тілінде жаднамалар таратылғанын айтты. Қазір арнайы түсіндіру жұмыстарын жүргізетін топ пен құтқарушы үйірмелері жұмыс істеуде. Су көліктерінің, оның ішінде гидроциклдер санының артуы да басты мәселеге айналған.
- Төтенше жағдайлар басқармасының қызметкерлері шомылу маусымы басталғаннан бері жергілікті полиция қызметімен бірлесіп су қоймалары мен шомылуға арналмаған орындарда әр аптада рейдке шығуда. Сала мамандары рейдте арнайы жаднамалар таратып, балаларға ескерту жасап жүр. Шомылуға келушілердің қарасы түстен кейін көбейеді. Қала тұрғындары, арты қайғылы оқиғаларға алып келмес үшін, сақтық пен қауіпсіздікті ұмытпағаны абзал,- дейді Шығыс өңірлік аэромобильдік жедел құтқару жасағының Семей қалалық бөлімшесінің басшысы Айтбек Сатыбалдин.
Өрт қауіпсіздігіне қатысты журналистер сауалына Семей қаласы ТЖБ Мемлекеттік өртке қарсы бақылау бөлімі (МӨББ) бастығы Ернар Жәлелов жауап берді. Оның айтуынша, 2017 жылы 212 өрт оқиғасы орын алып, 132 адам құтқарылыпты. Оның 32-сі - балалар. Тілсіз жаудың кесірінен 4 адам қаза тапқан. Ал биылғы жылы 273 гектарды қамтыған орман өртінің орын алғаны семейліктердің есінде.
- Біз қол қусырып отырған жоқпыз. БАҚ арқылы үгіт-насихат жұмыстарын жүргізудеміз. Ауылдық жерлерде әкімдік қызметкерлерін қатыстыра отырып, орман және дала өрттерін өшіруге байланысты оқу-жаттығу шараларын тұрақты өткізіп тұрамыз. Балалардың демалу орындарына да тұрақты рейдтер жүргізудеміз. Табиғат аясында демалушылардың өртке жол бермеулері тұрақты назарда, - деді Ернар Ермекұлы.
Семей өңірінде 6 өрт сөндіру посты бар. Олардағы техника 80 пайызға жаңартылған екен. Биыл тағы да жаңа техникалар алу көзделуде. Сәтін салса, Бөкенші ауылында да өрт сөндіру постын орнату жоспарлануда. Бұл пост тұрғындарының саны 3 мың 730 адам болатын 3 ауылды қамтымақ.
- Өткен жылы 9 дала өрті және 25 өрт ошағы орын алды. Осының 12-сін ерікті өрт сөндірушілер өз күштерімен ауыздықтады. Сондай-ақ орын алған 37 орман өртін жергілікті шаруашылықтар, біздің араласуымызсыз, өздері өшіре білді,- деді Ернар Жәлелов.

Серік ӘБІЛҚАСЫМҰЛЫ

ТҰРҒЫНДАР ШАҒЫМЫ «НҰР ОТАННЫҢ» БАҚЫЛАУЫНДА

12 маусым, сейсенбі күні «Нұр Отан» партиясының Семей қалалық филиалының қоғамдық қабылдау бөлімінде Еңбек, әлеуметтік қорғау және көші-қон комитеті ШҚО бойынша департаментінің басшысы Болат Сатеков азаматтарды жеке сұрақтары бойынша қабылдады. Департамент басшысына жеке мәселесімен бес азамат келді. Олардың басым бөлігі мүгедектік топқа өтуге қатысты өтініш-тілектерін жеткізді. Біреуі мүгедектікке құжат рәсімдей алмай әлек, енді бірі мүгедектіктің үшінші тобынан екінші тобына өте алмай жүр.

Қабылдауға келгендер қатарында болған Александр Беляев пен Мейрамғазы Мұқажанов - біраз уақыттан бері мүгедектік топқа өте алмай жүрген жандар. Екеуінің де диагнозы бір-біріне ұқсас. Қаланың қос тұрғыны қант диабеті ауруына шалдыққан. Мысалы, А.Беляев емдеу мекемелерінің табалдырығын сан мәрте тоздырғанымен, еш нәтиже жоқ екенін айтып қынжылды. 

- Тыныс алуым күннен-күнге қиындап барады. Бір адым бассам, ентігіп, жүре алмай қаламын. Отбасылық-дәрігерлік амбулаториядағы дәрігерлердің бақылау комиссиясында болдым. Ондағылар Өскемен қаласына жіберіп, кейін ауруханаға жатып емделдім. Міне, бес жыл болды мүгедектік топқа өте алмай жүргеніме,- дейді Александр Беляев.
Еңбек, әлеуметтік қорғау және көші-қон комитеті ШҚО бойынша Департаментінің басшысы Болат Сатеков азаматтың өтінішін тыңдағаннан кейін, оның барлық анализдерінің қорытындыларын Семей қалалық медициналық-әлеуметтік сараптама (ары қарай - МӘС) бөлімінің басшысы Райхан Өзбекова қарап, тиісті шешім шығарылатынын түсіндіріп берді.
Осыған ұқсас мәселемен келген Мейрамғазы Мұқажанов 62 жаста. 2005 жылдан бері қант диабеті ауруымен күресіп келеді. Бес уақыт инсулин алып жүрген оның ең болмағанда үшінші топтағы мүгедектік тағайындалса деген тілегі бар. Себебі жұмыс істеуге қауқары жоқ, дендеп бара жатқан сырқатынан көз көруі де нашарлап барады. Сөзіне қарағанда, учаскелік дәрігері мүгедектік құжатты рәсімдеуге еш құлық танытпай отырған көрінеді. Тіпті ол мүгедектік топқа өткізу, өткізбеу жөніндегі мәселені қарайтын дәрігерлік бақылау комиссиясы бар екенінен бейхабар. Өз кезегінде Департамент басшысы партияның қабылдау бөлімінің меңгерушісіне осы мәселені хаттамаға толтырып, денсаулық сақтау басқармасы арқылы шара қолдану жағын қарастыру керек екенін атап өтті.
Партия арқылы атқарушы органдардан көмек сұрап келгендердің ішінде семейлік Тілеубай Айсанов та бар еді. 80-ші жылдары аттан құлап, бір аяғын зақымдап алған азамат та мүгедектікке өту жөніндегі мәселемен келіпті мұнда.
- Аяғымды жарақаттап алғаннан кейін кезінде сүйек туберкулезі деп аталған ауруханада жаттым. Мүгедектік тағайындалды, бірақ өзім бас тарттым. Қазір, 4-5 жылдың жүзі болды, оң аяғым ауырып жүр. Кейде жүре алмай қаламын. Дәрігерлер квотамен эндопротездеу отасын жасау керек дейді, бірақ әлі күнге дейін порталға енгізген жоқ. Дәрігерлердің бақылау комиссиясына да жібермей отыр,- дейді Тілеубай Айсанов.
- Мүгедектік топқа өтудің арнайы қағидалары бар. Сол бойынша 4 ай бойы емделуіңіз керек. Осы уақыт ішінде дәрігердің қарауында боласыз. Стационарға жату керек болса, жатасыз, ота жасау керек болса, ол да жасалады квота арқылы. Ем қабылдағаннан кейін, денсаулығыңыз жақсармаса, Сізді медициналық сараптама бөліміне жібереді. Егер оң өзгерістер байқалып жатса, онда Сізге ешқандай сараптама жасалмайды. Демек, мүгедектік топқа жатқызуға еш негіз жоқ. Жылына бір рет қарала салу деген болмайды, үнемі учаскелік дәрігердің бақылауында болуыңыз керек,- деп түсіндірді МӘС бөлімінің басшысы Райхан Өзбекова.
56 жастағы Талғат Ескалмасов - өмір бойы қоғамдық көлік жүргізушісі болып еңбек еткен атпалдай азамат. Қазіргі таңда жұмыс істеуге денсаулығы жарамайды. Он екі жылдан бері бел омыртқасы ауырады. Үш жыл бойы дәрігерден дәрігерге сабылған ол үшінші топтық мүгедектікке әрең қол жеткізіпті. Жүріп-тұруы қиындап бара жатқан азамат бұл жолы мүгедектіктің екінші тобына өту жағын айта келіпті.
«Нұр Отан» партиясының Семей филиалында өткен қабылдауға өтініштерін арқалап, тығырықтан шығудың жолын іздеп келген тұрғындардың мәселесі бақылауға алынып, қажетті шаралар қабылданатын болады. Осындай қабылдау ендігі кезекте Тарбағатай ауданында жүргізілмек.

Жібек СЕРҒАЗЫ

ДАНИАЛ АХМЕТОВ:СЕМЕЙ ЕЛДЕГІ АЛДЫҢҒЫ ҚАТАРЛЫ МЕДИЦИНА ОРТАЛЫҒЫНА АЙНАЛАДЫ

Дүйсенбі, 4 маусым күні Семейге Шығыс Қазақстан облысының әкімі Даниал Ахметов келіп, бірқатар әлеуметтік маңызы бар нысандардың жұмысымен танысты. Алдымен әуежайдағы жөндеу жұмыстарымен танысқан аймақ басшысы артынша РК-1 жылу қазандығына, Жедел медициналық жәрдем ауруханасына, Қарағайлы ықшам ауданына, Қазақ инновациялық гуманитралық-заң университетіне, Қайнар колледжіне, Электротехникалық колледжге, сондай-ақ Ақсай ықшам ауданына, «СемАз» және «Daewoo Bus Kazakhstan» ЖШС фирмаларына барды.

2016 жылы басталған Семей әуежайының жөндеу жұмыстары биылғы жылдың шілде айында аяқталуы тиіс болатын. Бірақ үш айға созылған сот процесі құрылысты белгіленген мерзімде бітіруге кедергі болған. Мердігер компания «Терезе» ЖШС-нің директоры Лұқбек Тұмашиновтың айтуынша, бөлінген 10 млрд-тан аса қаражаттың бүгінде игерілгені - 9 млрд. теңге. Қазіргі күні ұзындығы 3 шақырымнан асатын ұшып - қону жолағының, диспетчер бөлімшесінің, апаттық - құтқарушы қызмет станциясының және әуежай шатырының құрылыс жұмыстары тамамдалған. Ал қалыңдығы 46 см-ге жететін ұшақ тұрағына асфальт төсеу әлі жалғасуда. 

Қыркүйек айының соңында немесе қазан айының басында әуежай толығымен жолаушылар игілігіне қайта беріледі деп жоспарланып отыр. Мердігер компания әуежайдың сыртқы ғимаратын әйнекпен көмкеру үшін аймақ басшысынан қосымша 100 млн. теңге қаражат қарастыруды өтінді.
- Семей әуежайын заманауи ұшу алаңына айналдыру үшін бюджеттен 10 млрд. теңгеден астам қаржы бөлдік. Енді 100 млн. теңге үшін сараңдық танытпаспыз. Жоба дайын болса, ақша да табылады. Бүгін кешке дейін жаңа жобаны ұсынуларыңызды сұраймын. Жөндеу жұмыстарынан кейін Семей әуежайы шығыстағы ең үздік ұшу алаңдарының біріне айналады,- деді Даниал Кенжетайұлы.
Лұқбек Тұмашиновтың айтуынша, ғимарат ішкі және халықаралық рейстерге арналған екі залға бөлінеді. Сондай-ақ ол әуежайға жүк терминалдарының да қойылатынын хабарлады.
- Өткен жылғы сапарында аймақ басшысы ғимараттың салқын екенін байқап, жылу жүйесін жаңарту үшін қосымша қаржы қарастырған болатын. Әуежайдың шатыры осы талаптарға сәйкес ауыстырылып, су мен жылу жүйелері жаңартылды. Жертөлеге жиналған жер асты суларын ретке келтіру жұмыстары да аяқталуға жақын,- дейді мердігер компания басшысы Лұқбек Тұмашинов.
Әуежайдағы сапарынан кейін облыс әкімі Даниал Ахметов РК-1 жылу қазандығына келіп, алдымен журналистерден ыстық су жайын сұрады. Мәселенің шешімі табылғанына көз жеткізген соң облыс әкімі атқарылып жатқан шаруалар барысын пысықтады.
РК-1 жылу қазандығын кеңейту және қалыпқа келтіру үшін бюджеттен 11 706, 313 млн. теңге бөлініпті. Жоба 2012 - 2017 жылдар аралығында үш кезеңде жүзеге асады деп жоспарланған. Мұндағы жұмыстарды тамамдау үшін биылғы жылы бюджеттен қосымша 322, 143 млн. теңге бөлінген. Жылу қазандығын желіге қосу үшін тағы 200 млн. теңге қажеттігін айтқан «Теплокоммунэнерго» МКК директорының орынбасары Расылқан Жолдасовқа облыс әкімі тез арада құзырлы мекемелерге өтініш беруді тапсырып, тиісті қаражатты бөлетінін айтты.
- 1997 жылдан бері Семейде болмаған ыстық су мәселесі бір жолға қойылып, қаладағы тұрғын үйлердің 90 пайызы қамтылды. Осылайша, біз семейліктер алдындағы міндеттеріміз бен уәделерімізді орындап келе жатырмыз. Енді РК-3 жылу қазандығын қалыпқа келтіруіміз қажет. Қыркүйек айында екінші кезеңдегі жобаның сметалық құжаттары дайын болады,- деді аймақ басшысы.
Төрт кезеңнен тұратын РК-3 жылу қазандығын кеңейту және жөндеу жұмыстары Қарағайлы ықшам ауданындағы тұрғын үйлерді жылумен қамту үшін қажет. 2017 жылы басталған бірінші кезең бойынша атқарылуы тиісті шаруалар биылғы жылдың маусым айында аяқталады деп жоспарланған. Бұл бағытта 2017 жылы бюджеттен 497, 707 млн., ал 2018 жылы 101, 971 млн. теңге бөлініпті.
Облыс әкімі аялдаған келесі нысан Семей Жедел медициналық жәрдем ауруханасы болды. Облыс әкімінің айтуынша, тура алты айдан соң бұл ауруханада елімізде бұрын-соңды болмаған бірегей гибридті ота залы ашылады. Бұл ота залы жүрек-қан тамырлары және инсульт ауруларын емдеуге және науқас диагнозын тез арада анықтауға мүмкіндік бермек. Жедел көмек көрсетуге оңтайлы болу үшін гибридті зал аурухананың бірінші қабатында орналаспақ. Сондай-ақ осы мекемеде жуық арада политравма және ортопедия орталығы жұмысын бастайды деп жоспарлануда. Жобаны Астана қаласындағы травматология және ортопедия ғылыми-зерттеу институты мен Семейдегі мемлекеттік медицина университеті бірлесіп жүзеге асырмақ.
- Семей Жедел медициналық жәрдем ауруханасында Қазақстандағы алғашқы гибридті ота залын ашамыз. Мұндағы 6 операциялық блогтың біреуі травматология институтымен бірге жұмыс істейтін болады. Таяуда Семей қаласы да, Өскемен секілді, елдегі алдыңғы қатарлы медицина орталықтарының біріне айналады. Мен бұған сенімдімін және асыра сілтеп айтып отырған жоқпын. Әр жыл сайын 60-80 дәрігерді Еуропада оқытамыз. Биылғы жылдың екінші жарты жылдығында және келесі жылдың бірінші жарты жылдығында аймақтағы аудандар мен қалалардағы барлық бас дәрігерлер 3-6 ай мерзімінде Еуропа елдері - Англия, Польша, Францияда білім алатын болады. Осылайша, адам капиталының сапасын арттыруға баса көңіл бөлеміз. Әр жыл сайын 2400 дәрігер мен медбике Семей мемлекеттік медицина университетінде қайта даярлаудан өтеді. Енді олар бір рет білім алып, оны өмір бойына қолдану қағидатына емес, өмір бойы білім алу қағидатына сүйенетін болады. Біздің дәрігерлер осы өмірлік маңызы бар қозғалыстың алғашқы қатысушылары болып отыр,- деді Даниал Кенжетайұлы.
Облыс әкімінің айтуынша, елдегі медицина саласының ең үздік құрал-жабдықтары Шығыс Қазақстан облысында екен. Қазіргі күні аймақтағы медицина мекемелерін заманауи жабдықтармен қамтуға 17 млрд. теңге бөлінсе, ендігі жылы қосымша 6 млрд. теңге қарастырылмақшы.
- Біздің басты мақсатымыз - тек ауруханаларды жабдықтау емес. Адам капиталы да соған сәйкес болуы шарт. Сіздерді алдымен 3 айға, екі жылдан кейін жарты жылға оқуға жібереміз. Бір жылдан кейін, ауруханаларды жабдықтауды аяқтаған соң, сіздердің алған білімдеріңіз ескіріп қалады. Сондықтан әрдайым білімді жетілдіріп отыру – заманның талабы. Гибридті ота залының дәрігерлері сол деңгейге сай болулары қажет. Әр күн сайын ағылшын тілін оқыңыздар. Біз сонда ғана Елбасы алдымызға қойған мақсаттарға қол жеткізіп, кенжелеп қалған медицинамызды көтереміз. Өкінішке орай, кеңестік кездегі медициналық жүйе бізде әлі өзгерген жоқ. Университеттегі оқыту бағдарламалары да артта қалып қойғанын мойындауымыз керек. Министрлік келешекте бұл жүйеге өзгерістер енгізеді деп ойлаймын. Тек сол кезде елдегі медицина саласы Президент пен Қазақстан халқы талаптарын орындай алатын мүмкіндіктерге ие болады,- деді Даниал Кенжетайұлы студенттерге арнаған сөзінде.
ШҚО Денсаулық сақтау басқармасының басшысы Марат Шоранов аймақ басшысын науқастарды ауру деңгейіне байланысты сұрыптауға арналған триаж жүйесімен таныстырды. Сондай-ақ ШҚО-да денсаулық сақтау саласын дамытудың үш жылдық жоспары жүйелі түрде орындалып жатқанын тілге тиек етіп, дәрігерлердің біліктілігін көтеруге баса көңіл бөлініп, 2018 жылы бұл мақсатта бюджеттен 1 млрд. теңге жұмсалғанын айтты.
Семей Жедел медициналық жәрдем ауруханасынан соң аймақ басшысы Қарағайлы ықшам ауданына барып, құрылыс жұмыстарымен танысты. Жаңа ауданда «Ертіс» ӘКК» АҚ және «Бәйтерек Девелопмент» АҚ-ның тұрғын үй бағдарламасы аясында салынған алғашқы үйлер пайдалануға беріле бастапты. Жыл аяғына дейін ондаған көп қабатты баспана семейліктердің игілігіне жарамақ.
Сондай-ақ осы ауданда «Абай Арена» кешені салынып жатқаны белгілі. Кешеннің шатырын аймақ басшысы байрағымыздың түсімен сәйкестендіру жайлы ұсынысын айтты.
- «Абай Арена» шатырының түсі Туымыздың түсімен бірдей болса деген ұсынысым бар. Жуық арада бұл Семейдің ең көрнекті нысандарының біріне айналады. Бір жылдан кейін қалалықтар бос уақытын өткізу үшін осында келіп, спортпен шұғылданатынына күмән келтірмеймін. Ерекше сәулетті кешен халықаралық жарыстарды ұйымдастыруға да қабілетті болады,- деді аймақ басшысы.
Жобалық құны 19 млрд. теңгені құрайтын кешеннің жалпы ауданы 34 мың шаршы метрге жуықтайды деп жоспарлануда. Құрылыс жұмыстарымен мердігер мекеме «Фирма «Азия» ЖШС айналысып жатыр. 5 мың орынға шақталған «Абай Аренаның» ашылуы өткеннен кейін, шаһарда салауатты өмір салтын ұстанушылардың қатары артады деген пікірлер де жиі айтылуда. Осы орайда айта кетейік, өткен жылдың соңында басталған құрылыс жұмыстары 2019 жылдың желтоқсан айында тамамдалмақшы. Осы күнге дейін кешенде 4 млрд. теңгені құрайтын құрылыс нысандары бой көтерсе, биылғы жылы тағы 8 млрд. теңге бөлінген.
Сондай-ақ осы ауданда әуенді түрлі - түсті субұрқақ салынатыны туралы сол күнгі сапарында аймақ басшысы Даниал Ахметов мәлім етті. Ол әзірге Назарбаев Зияткерлік мектебі мен «Абай Арена» кешені аралығында орналасады деп күтілуде.
Осыдан кейін аймақ басшысы Ақсай ықшам ауданына соғып, мұнда салынып жатқан жеке тұрғын үйлердің құрылыс жұмыстарымен танысты. Семейде «Нұрлы жер» бағдарламасы аясында бой көтеріп жатқан тұрғын үйлерді салумен «Сәт-Транс» ЖШС, «Өркен» ЖШС және Семей Асбест-Цемент бұйымдары зауыттары айналысуда. Жеке тұрғын үйлер шаһардағы 10 ауданда - Ақсай, Ұшақтар, Комсомол, Суық бұлақ, Жарқын, Бобровка, Ақ қайың, Жібек жолы, Кіші Ақтөбе және Степной кенттерінде - бой көтермек. 2017 - 2021 жылдар аралығында алғашқы тұрғын үйлер Ақсай, Ұшақтар, Комсомол аудандарында салынады.
Ақсай ықшам ауданында жеке тұрғын үйлерді салу үшін 60 жер телімі бөлінсе, оның 50-і жыл аяғына дейін пайдалануға беріледі. «Тұрғын үй құрылыс жинақ банкі» АҚ аясында қолжетімді болатын бұл баспаналардың шаршы метрінің бағасы 120 мың теңгені құрап отыр. Қазір аталмыш ауданда алғашқы үш үйдің құрылыс жұмыстары аяқталған.
Сондай-ақ аймақ басшысы сол күні «СемАЗ» және «Daewoo Bus Kazakhstan» зауыттарын аралап, жергілікті өндіріс орындарының бүгінгі жай-күйіне қанық болды.
Шығыс Қазақстан елдегі ауыл шаруашылығы өркендеген өңірлердің бірі екені рас. Сондықтан өндіріске қажетті ауыл шаруашылығы техникалары мен көліктерін шет мемлекеттерден немесе өзге қалалардан тасымай, өзімізден сатып алғанымыз ләзім. Аймақ басшысының айтуынша, осы мақсатта «СемАЗ» ЖШС-де алты операцияны орындай алатын егістік кешенінің өндірісін ұйымдастыру көзделуде.
- Жаңа техникалар бәсекеге қабілетті болуы үшін арнайы жоба дайындап шығару ойымызда бар. Үкімет бізді қолдайды деп ойлаймын. Бірақ ол үшін бұл саланың нағыз шеберіне айналуымыз керек. Отандық нарықта қазақстандық өнімнің көрсеткіші 40-60 пайыздан кем болмауы қажет. Осы бағытта жұмыс істемейміз,— деді Даниал Ахметов.
Аймақ басшысы облыстың аталмыш зауыттан автобустар сатып алуға ниетті екенін де айтты. Бұл бағытта Еуропалық қайта құру және даму банкімен бірлескен бағдарлама әзірленіп, автобустарды тек шығысқа ғана емес, Қазақстанның өзге облыстарына да шығару жоспарда барын айтады облыс әкімі.
Газетіміздің өткен санында биылғы оқу жылында ШҚО-ның 272 мектебінде робототехника кабинеттері ашылатынын айтқан едік. Бұл орайда педагогтер мен оқушыларды қайта даярлауға арналған жаңа оқыту бағдарламалары қажет екені даусыз. Осы мақсатта өз жобаларын ұсынған шаһардағы оқу орындары арасынан аймақ басшысы Электротехникалық колледждің мүмкіндігін жоғары бағалады.
Аталмыш колледж қабырғасында 2013 жылы өзін-өзі жұмыспен қамтыған, жұмыссыз және жаңа технологияларды игеруге бейім жандар үшін халықаралық ресурстық орталық ашылыпты. Сонымен қатар жарты жылдан бері мектеп оқушылары мен студенттерге арналған ІТ - орталығы іске қосылған. Колледждің Ыбырай Алтынсарин атындағы қорының арқасында бүгінде ниет білдірген кез келген қала тұрғынына орталыққа келіп, тегін білім алуына мүмкіндік туып отыр. Колледж директоры Азат Сарпековтің айтуынша, орталықтан білім алушы ең үлкен студент 67-де болса, ең жасы 15-те. Мамандығы мен жасына қарамастан, орталықтың студенттері жарнама, мехатроника, робототехника, электронды кітап жасау, веб-сайт құрастыру сынды әртүрлі бағыттар бойынша колледж қабырғасында жабдықталған арнайы өндіріс орнында тәжірибе жинақтауда.
Электротехникалық колледж ұжымының Абу-Дабиде өткен халықаралық «WorldSkills» жобасында 150 елдің арасынан 23-орынды, ал Қазақстанда бірінші орынды иеленгенін айта кеткен жөн. Жаңашыл оқу орнында шетелден келіп оқитын студенттер қатары да артып келеді екен.
Сондай-ақ колледж директоры Азат Сарпеков аймақ басшысын тұрғындарға үйін смартфон арқылы басқаруға мүмкіндік беретін «Smart house» («Ақылды қала») жобасымен таныстырды. Аймақ басшысы Семейдегі сапарын Титова, 142 мекенжайындағы жатақхананы аралаумен түйіндеді. Жеке инвестор есебінен сатылып алынып жөндеуден өткен бұл жатақхана мемлекеттік - жекеменшік әріптестік аясында Қалматаев атындағы мемлекеттік медицина колледжі студенттеріне берілмекші. Әлеуметтік жағдайы төмен отбасылардың балаларына арналған интернаттың бірнеше жылдан бері бос тұрған бұл ғимаратын жеке кәсіпкер Дайырхан Досқұжанов осыдан бір жыл бұрын сатып алып, күрделі жөндеуден өткізген. Төрт қабатты ғимараттың су, жылу, электр жүйелері мен шатыры ауыстырылып, жаңа терезелер орнатылған. 116 бөлмеден тұратын жатақхана 350 орынға шақталған.
- Елбасы тапсырмасына сәйкес, жатақхана тапшылығын шешу мәселесін назардан тыс қалдырған жоқпыз. Семейде де бұл бағытта жұмыстар атқарылып жатыр. Шаһарда кем дегенде 11 жатақхана салынуы керек. Электротехникалық колледж жатақханасының құрылыс жұмыстары тамамдалуға жақын. Қазір Қалматаев атындағы медициналық колледж студенттерін жатақханамен қамтуды қарастырудамыз. Осылайша, 1 қыркүйекке дейін Семейде 800 адамға арналған 2 жатақхана пайдалануға беріледі. Қалған 9 жатақхананың құрылысы үшін жер телімдері бөлінді, құрылыс жұмыстары таяуда басталады,- деді Даниал Ахметов.

Жадыра ТӨЛЕГЕНҚЫЗЫ

 

ТЕОРИЯ мен ТӘЖІРИБЕНІ ТОҒЫСТЫРҒАН ӘРІПТЕСТІК

Жұма, 1 маусым күні Семей мемлекеттік медицина университеті мен Семей қаласындағы физика-математика бағытындағы Назарбаев Зияткерлік мектебі арасында ынтымақтастық туралы меморандумға қол қою рәсімі өтті.

Бұдан былай қос білім ордасы инновациялық жобаларды жасау, кәсіби мамандарды даярлау, біліктілікті арттыруда өзара тәжірибе алмасып, ортақ мақсатта жұмыс атқармақ. 

Семей мемлекеттік медицина университетінің ректоры Ерсін Жүнісов:
- Меморандумның мақсаты бірлескен ғылыми зерттеулерді әзірлеу мен жүзеге асырудағы ынтымақтастықты орнату және дамыту болып табылады. Оның ішінде оқушылардың танымдық қабілеттерін дамытуға, алған білімдерін күнделікті өмірде тиімді пайдалана білуге, өзін-өзі тану мен өзін-өзі басқара алуға ықпал ететін қазақстандық және халықаралық білім беру жобаларын жүзеге асыру.
Ынтымақтастықтың негізгі бағыттары - инновациялық ғылыми жобаларды әзірлеу және енгізу бойынша тәжірибе алмасу, оқушыларды жоғары оқу орындарына дайындауға байланысты элективтік курстарды бірлесе әзірлеу, зияткерлік мектеп оқушыларын халықаралық олимпиадалар мен байқауларға бірлесіп дайындау, оқушылардың жоғары оқу орындарында кредиттік технология арқылы білім алуын қалыптастыру,- деп атап өтті.
Ал Семей қаласындағы физика-математика бағытындағы Назарбаев Зияткерлік мектебінің директоры Бағдан Қайыржанов алдағы уақытта екі білім ошағы арасында тәжірибе алмасу, әріптестік бағыттағы түрлі жобалардың жоғары деңгейде іске асатынына бек сенімді. Сондай-ақ СММУ ректоры Ерсін Жүнісовке өздері қолға алатын болашақ жобалары жайында айтып өтті.
- Өзгермелі қоғамға жоғары білімді, IT саланы жетік меңгерген, сындарлы ойлау, өзіндік ізденіс пен ақпаратты терең талдау машығын игерген мамандар қажет. Осы орайда еліміздегі Назарбаев Зияткерлік мектептерінің оқушыларына бәсекеге қабілетті деңгейде оқытуға басымдық жасалуда. Бүгінгі меморандум - соның айқын дәлелі,– деді өз сөзінде Бағдан Тоқтамысұлы.
Қос тарап болашақ мамандардың кәсіби әлеуетін арттыруға ықпал ететін білім беру бағдарламаларын жетілдіруді бірлесе жалғастыру қажеттігін айрықша атап өтті.
Теория мен тәжірибенің арасын осылайша бір қадам жақындастырған меморандумның берері мол.

Серік ӘБІЛҚАСЫМҰЛЫ

Меншік иесі: «Семей таңы – Вести Семей газеттері» ЖШС

Техникалық директор:Қайрат Жолобаев

Бас редактор: Ерзат Жанатұлы

           

Ескерту! Кез келген

материалды көшіру және жариялау

үшін редакцияның арнайы

рұқсатын алу қажет!

 

Телефон: 8-775-746-46-70,

8-707-372-57-00

Кеңсе тел.: 8-7222-52-36-57