ЫНТЫМАҚТАСТЫҚ МӘСЕЛЕЛЕРІ ТАЛҚЫЛАНДЫ

Шығыс Қазақстан облысының әкімі Даниал Ахметов Өскемендегі РФ Бас консулы Михаил Королевпен кездесті. Екі жақты кездесуде Шығыс Қазақстан мен Ресей арасындағы серіктестік пен ынтымақтастық жағдайы талқыланды.

Кездесуде облыс әкімі білім мен мәдениет саласындағы мәселелерді қарастыруды ұсынды. Мәселен, жақын орналасқан аймақтар арасында театр керуенін ұйымдастыру. Сондай-ақ жақын арада Д.Серікбаев атындағы ШҚМТУ-да атом саласындағы мамандықтар факультетін ашу жоспары туралы айтып өтті.
– Ол үшін қазіргі таңда үлкен мүмкіндіктер жасалуда. Сіздер білесіздер, бізде бірегей өндіріс пен қажетті жағдайдың бәрі бар. Бірнеше жылдан кейін Қытаймен, Франциямен бірлесе ресейлік тауарға бәсеке болар түпкілікті жылу құрастыру өнімдерін шығаратын боламыз. Ол үшін өзімізде мамандарды дайындаймыз. Бұл ретте айта кетерлігі, ШҚО-да базалық кәсіпорын мен әлемдегі ең үлкен тау-кен өндірісі бар,- деді Даниал Ахметов. – Екі жақ серіктестігі конструктивті сипат алғанын қалаймын. Бірқатар білім беру құрылымдарын құруды көздейміз. Сондай-ақ мәдениет саласында тәжірибемен алмасу жұмысын жандандыру қажет. Біздің театрлар сіздерге, сіздердікі біздің өңірге сапар жасауы керек. Атап өтсек, Ресей мен ШҚО арасындағы сыртқы тауар айналымы өткен жылдан бастап 10 пайызға артқан. Бұл бағыттағы жұмыс барлық стратегиялық маңызды салаларда жалғасуда.

 

 

ҚАЛАНЫҢ ҚҰРМЕТТІ АЗАМАТЫ АТАНДЫ

Философия ғылымдарының докторы, профессор, Қазақстан Республикасының Ұлттық ғылым академиясының академигі, абайтанушы Ғарифолла Есімге Семей қаласының Құрметті азаматы атағы берілді. Салтанатты рәсім бейсенбі, 19 сәуір күні қалалық әкімдікте өтті.

Семей қаласы мәслихатының шешімімен Ғарифолла Есім Семей қаласының Құрметті азаматы атанды. Салтанатты жиынға қала әкімі Ермак Сәлімов, қалалық мәслихат хатшысы Бейсенбек Ақжалов, қалалық мәслихат депутаттары, бөлім қызметкерлері мен Ғарифолла Есімнің жолдастары, жерлестері, әріптестері және қала тұрғындары қатысты.

- Қадірлі ағайын, бүгін сіздермен жақсы шараға, алдыңғы толқын ағаларға құрмет көрсету үшін жиналып отырмыз. Ғарифолла Есім - адал еңбегінің арқасында халықтың алғысын алған асыл азамат. Семей қаласы мәслихатының шешімімен, Сіз Семей қаласының Құрметті азаматы болдыңыз. Сіздің ғылым үшін еткен еңбегінің ұшан - теңіз. Біз Сізді мақтамаймыз, біз Сізді мақтан етеміз, еңбегіңіз жемісті болсын,- деді қала әкімі Ермак Сәлімов.
- Барлығыңыз жақсы білесіздер, Ғарифолла Есім - Семей өңіріне, Қазақстанға еңбегі сіңген азамат. Мәскеуге оқуға кетпей, Семей жеріне келдіңіз. «Мен сондықтан абайтанушы болған шығармын. Егер Мәскеуге оқуға кетіп қалсам, Пушкинді, Лермонтовты зерттеп жүрер ме едім?!» деген сөзіңіз есімде. Қазақта «Жақсы адамнан қол үзбе, шөлдегенде сусының» деген даналық сөз бар. Сіз ұтымды ойларыңызбен, терең біліміңізбен көпке үлгі болып жүрген жандардың бірісіз. Семей - қасиетті жер, ұлы Абайдың елі. Осы киелі топырақтың Құрметті азаматы атануыңызбен шын жүректен құттықтаймыз!- деді Семей қалалық Көлік колледжінің директоры Шаған Жұмақсанов.
Семей қаласының Шәкәрім атындағы мемлекеттік университетінің ректоры Мейір Ескендіров те оқу орны атынан ғалымды құттықтап, «Мәңгілік Ел» ұлттық идеясын халыққа алғаш ұсынған Ғарифолла Есім екенін сөзіне тиек етті.
Семей туралы, ұстаздары туралы жылы естеліктерімен бөліскен ғалым жиын соңында барлық жиналған қауымға, қала әкімі Ермак Сәлімовке алғысын білдірді.
- Мен Семейдің пединститутына оқуға 1966 жылы келдім. Студенттік жылдарым мен жастық шағым осы қалада өтті. Семейдің әрбір көшесі менің есімде. Семей - маған өте ыстық қала. Мұндағы студенттік жылдарым есімнен кетпейтін қызықты кездерім еді. Осы қаладан өзіме тамаша жолдастар, ұстаз, шәкірт таптым. Семейде менің үлкен ұстаздарым бар. «Хакім Абай», «Данышпан Шәкәрім», «Кемеңгер Мұхтар» деген кітаптарым жарық көрді. «Хакім Абай» дүние жүзіндегі негізгі тілдерге аударылды. Егер осы тұлғаларға шәкірт болуға жарасам, мен оларды ұстазым деп санаймын. Алғашқы курстан бастап төрт жыл тәлімін алған Қайым Мұхамедханұлы да менің ұстазым. Ол кісі мені жанынан екі елі қалдырмай алып жүрді, білгенін үйретті. Шындығында, әр адам ұстаз бола алмайды. Ұстаз болу үшін, ар тазалығымен қоса, адалдық керек. Ұстаз ешқашан өтірік айтпауы қажет. Қайым Мұхамедханұлы сондай адам болды,- деді Ғарифолла Есімұлы. - Бүгінгі марапат мен үшін орденнен, барлық марапаттан биік. Өйткені мен Семей қаласының Құрметті азаматы атағын алып отырмын. Павлодар облысының Құрметті азаматы атағын алғанда бұлай толқыған жоқ едім. Семей деген Қазақстанда бір ғана қала бар. Оны Қазақстанның Санкт - Петербургі деп айтады. Өйткені елдегі барлық рухани жағдай осы қалада өтті. Бұл шаһар - барлық қазақ зиялыларының табаны тиген жер. Сондықтан Семейдің халқы да ерекше. Менің қуанышым сіздермен бірге, семейліктер. Қошеметтеріңіз үшін үлкен рақмет!- деген Ғарифолла Есім қалалық мәслихат депутаттарына да ризашылығын білдіріп, қолтаңбасы қалдырылған кітаптарын табыс етті.

Жадыра ТӨЛЕГЕНҚЫЗЫ

13 ОТБАСЫҒА БАСПАНА КІЛТІ ТАБЫС ЕТІЛДІ

Аягөзде қоныс тойы жалғасуда. Қарғын судан үйлері зардап шеккен тағы 13 отбасына салтанатты түрде пәтер кілттері табыс етілді.

ШҚО-да көктемгі апаттың салдарын жою науқаны қызу жүруде. Қазіргі таңда барлық күш үйлерді, жолдар мен көпірлерді қалпына келтіруге бағытталған. Мәселен, Аягөзде қосымша Семей мен Тарбағатай ауданының 5 құрылыс компаниясы жұмыс істеп жатыр. Бұған дейін 118 миллион теңгеден астам қаржыға 28 отбасына тұрғын үй сатылып алынғаны хабарланған еді. Бүгін олардың қатары 13-ке толықты. Қазақстан мұсылмандары діни басқармасы және «NFS Kazakhstan» ЖШС қолдауымен тағы 2 жанұя баспаналы болды.
– Биылғы көктем біздің өңір үшін оңай болған жоқ. Тасқыннан 2 қала, 5 аудан, 33 елді мекен зардап шекті,- деді салтанатты жиында сөз алған Шығыс Қазақстан облысы әкімінің орынбасары Әсем Нүсіпова. – Қазіргі таңда тұрғындардың жағдайын жасау үшін ШҚО-ның барлық күші жұмыла әрекет етуде. Комиссия жұмыс жүргізіп жатыр, қаражат бөлінді. Облыс бойынша 23 құрылыс мекемесі жөндеу-қалпына келтіру жұмыстарын атқаруда.
Айта кету керек, осы уақытқа Аягөзде тағы 12 үй бақылау үстінде тұр, ал 15-нің жөндеу мерзімі иелерінің қалауымен кейінге шегерілді.

ШҚО әкімінің баспасөз қызметі.

 

«РУХАНИ ЖАҢҒЫРУ: АБАЙДЫҢ РУХТЫ СӨЗІ»

Ел Президентінің «Болашаққа бағдар: рухани жаңғыру» атты бағдарламалық мақаласының жарияланғанына бір жыл толды. Осыған орай Семейде 19-20 сәуір күндері «Рухани жаңғыру: ұлы Абайдың рухты сөзі» атты Open space іс-шаралар легін қалалық Жастар ресурстық орталығы мен Шығыс Қазақстан облысының Ішкі саясат басқармасы бірлесіп өткізді.

19 сәуір күні облыстың әр ауданынан келген жастар мәслихатының хатшылары, жастар орталықтарының директорлары және қаладағы жоғары оқу орындары мен колледждердің белсенді студенттері Абай атындағы әмбебап кітапханада облыстық жастар форумында бас қосты. Жалынды жастардың басын біріктірген форум аясында семинар-тренинг ұйымдастырылып, онда жастардың шығармашылық және көшбасшылық қабілеттерін дамыту жөнінде бірқатар мәселелер айтылды.
- Біз осылайша аймақтың түкпір-түкпірінен келген жалынды жастарды ынталандыруды жөн көрдік. Облысымызда белсенділігімен, білімділігімен көзге түсіп, биік белестерді бағындырған жас азаматтардың қатысуымен семинар-тренинг өткіздік. Мұндай игі шара білімпаз студенттердің өмірде өз орындарын тауып, үлкен жетістіктерге жетуіне жол ашады. Ең басты мақсат – келешек ұрпаққа рухани жаңғырудың мән-мағынасын түсіндіру. Семей Қазақстанның рухани астанасы болғандықтан, іс-шаралардың дәл осы қалада ұйымдастырылуы орынды деп білемін,- деді Шығыс Қазақстан облысы Ішкі саясат басқармасы жанындағы Жастар ресурстық орталығының директоры Арайлым Есімбекова.
Дәл осы күні ШҚО жастар мәслихатының алғашқы сессиясы өтті. Сессия барысында жас депутаттар мәслихат хатшысы ретінде өскемендік Марат Сматовты бір ауыздан таңдады. Халық қалаулылары тәртіптік, медиакеңістікті және жастар саясатының жүзеге асырылу барысын бақылау сынды тұрақты үш комиссия бойынша жұмыс істейтін болады.
Келесі күнгі шаралар тізбегі Абай Құнанбаевтың рухына тағзым етіп, гүл шоқтарын қою рәсімімен басталды. Одан кейін аймақтағы барлық жоғары оқу орындары мен колледж студенттері бір уақытта «Қазақтың бас ақыны - Абай» тақырыбында жалпы (тотальды) диктант жазды. Белсенділер делегациясы шаһардағы Абай музейінің, «Алаш арыстары - М.Әуезов» және тағы басқа музейлердің құнды жәдігерлерімен танысып, «Қазақстанның 100 жаңа есімі» республикалық жобасының жеңімпазы, зергер Абылайхан Асылбаймен жүздесті. Екі күнге жалғасқан шара сәуірдің 20-сы күні орталық алаңда ұйымдастырылған концерттік бағдарламамен қорытындыланды.

Жібек СЕРҒАЗЫ

ҚАЙЫРЫМДЫЛЫҚТАН ҚАЛЫС ҚАЛМАДЫ

Орайы келгенде айта кеткеніміздің де артығы болмас. Жалпы, көктемгі тасқын су зардабын шеккен тұрғындарға республикамыздың түкпір - түкпірінен гуманитарлық көмектер керуенімен азық - түлік,киім - кешек, тұрмыстық заттар, құрылыс материалдары жеткізіліп қана қоймай, «Аягөз - Болашақ» қорының есепшотына бүгінде 179 млн. 804 849 теңге қаражат түсті.

Осы ретте атамекеніне шеттен оралған кәсіпкер ағайындар бизнестің әлеуметтік жауапкершілігі аясында қайырымдылыққа толы қайырлы істерді де атқарып, еліміздің әр жерінен аягөздіктерге қол ұштарын бере бастады.
Үстіміздегі жылғы наурыздың 11-ші жұлдызы күні Аягөз қаласында болған көктемгі су тасқынынан зардап шеккендерге туған еліне Қытайдың үш аймағынан Алматы өңіріне оралып, кәсіпкерлікпен айналысып жүрген 22 қандас ағайыннан «Берік болсын іргеміз, біз Сіздермен біргеміз!» атты гуманитарлық көмек, яғни 12 тонна азық - түлік келді.
- Қиын-қыстау шақта бабалар тағылымымен қайырымдылық пен қайырлы іс жасау үрдісін жалғастыру басты мақсатымыз болды. Атамекенімізді алыстан аңсап келгенде құшақ жая қарсы алып, жеке кәсіппен айналысуымызға жол ашқан Президентіміз Н.Ә.Назарбаевтың қолдауына ерекше тәнтіміз. Енді, міне, бүгінде біз де барымызды бауырларымызбен бөлісетіндей күйге жеттік. Осы бір қиын шақта елдегі ағайындарға демеу білдіре алмасақ, бауырласпыз деген атымызға сын емес пе? Біз бұдан бұрын да мүмкіндігіміз келгенінше талай іс - шараларға қатысып, демеушілік көрсеткенбіз. Алыстан ат басын елге бұрған ағайындардың шешімімен аягөздіктерге берген көмегіміз - шын ықылас, ізгі ниетімізден туындаған қайырымдылық,- деді өз сөзінде гуманитарлық көмекті бастап келген Қайтолла Қалымбек.
Жүректері «қазақ» деп соққан осынау сауапты істің тізгінін ұстаған азаматтарға жергілікті басшылық пен төтенше жағдайды жою жөніндегі жұмыс тобы мүшелері аудан тұрғындары атынан алғыстарын білдірді.

Марат ЖҰМАБАЕВ

 

Меншік иесі: «Семей таңы – Вести Семей газеттері» ЖШС

Техникалық директор:Қайрат Жолобаев

Бас редактор: Ерзат Жанатұлы

           

Ескерту! Кез келген

материалды көшіру және жариялау

үшін редакцияның арнайы

рұқсатын алу қажет!

 

Телефон: 8-775-746-46-70,

8-707-372-57-00

Кеңсе тел.: 8-7222-52-36-57