ЖАҢА БАҒЫТҚА - ЖАҢА АВТОБУС

 

Қаламыздағы қоғамдық көліктер қатары су жаңа 15 автобуспен толықты. Мереке күні жаңа автобустар салтанатты түрде пайдалануға берілді.

- Семейіміз күннен-күнге көркейіп, экономикасы жақсарып, әл-ауқаты артуда. Алдымызда қаланы одан әрі дамыту міндеттері тұр. Жыл сайын жаңа әлеуметтік нысандар, тұрғын үйлер, ықшам аудандар бой көтеруде. Бүгін, мереке қарсаңында, Қарағайлы ықшам ауданы мен қала орталығын, сол жағалауды жалғайтын №4 жаңа маршруттық бағыт ашылды. Облыс әкімі Даниал Ахметовтің тапсырмасына орай және қолдауының арқасында автобус паркін жаңалау жұмыстары жүйелі түрде жүзеге асырылуда. Өздеріңіз білетіндей, өткен жылдың соңында «Семей» автобус паркі өз жұмысын бастап, 20 орта класты жаңа автобус салтанатты түрде жолаушыларға қызмет етуге жіберілген еді. Бүгін «Семей» автобус паркі қаламыздағы «Daewoo Bus Kazakhstan» зауытында құрастырылған үлкен класты 15 жаңа автобусты таныстырып отыр. Аталмыш парк алдағы уақытта да тегеурінді техникасымен семейліктерді қуантып, алғысына бөлене береді. №4 маршрут халық арасында сұранысқа ие бағыт болады деген үміттеміз әрі жолға шыққан көліктерге сәттілік тілейміз!– деген Ермак Бидахметұлы беріліп отырған көліктердің ең басты ерекшелігі – отандық екенін, нақтырақ айтсақ, қаламызда шығарылғанын атап өтті. 

Айта кетсек, жаңа автобустар №4 бағыт бойынша Ұшақтар кентінен Қарағайлы ықшам ауданындағы Назарбаев Зияткерлік мектебіне дейінгі аралықты жалғайды. Бұрын тура қатынайтын қоғамдық көлік болмай, бірнеше ауысыммен қатынап жүрген тұрғындар үшін жаңа бағыттың ашылуы әрі онда жаңа көліктердің қызмет етуі - екі есе қуанышты жағдай. Бірақ қоғамдық көліктегі тазалықты сақтау жолаушыларға да байланысты екені белгілі.
- Мереке қарсаңында шаһар тұрғындары мен қонақтарының игілігіне жаңа әрі ыңғайлы автобус берілуде. Жүргізушілер мен кондукторларға бірегей киім үлгісі қарастырылған. Қоғамдық көліктің тазалығы автобус паркіне ғана емес, тұрғындарға да тікелей байланысты,- деді жаңа автобустардың біріне кондуктор болып жұмысқа орналасқан Шынар Оразбекова.
- Өздеріңіз білетіндей, біздің паркке тиесілі жасыл автобустар №8 және №5 бағыттар бойынша қызмет етуде. Бүгін көліктеріміздің қатары толықты. Құны шамамен 40 млн. теңге. Оларда қозғалыс мониторингін жасауға арналған GPS құралдар, спутник арқылы нақты орнын анықтауға мүмкіндік беретін автоақпараттандыру құрылғысы орнатылған. Wi-Fi - сымсыз интернет желісімен қамту да ойда бар. Мұнымен тоқтап қалмай, көліктердің қатарын көбейтіп, кәсіпорнымызды кеңейтуді жоспарлап отырмыз,- деген «Семей» автобус паркінің директоры Асқар Зияданов №5 маршруттың бағытына сәл өзгеріс енгізілгенін, 2 мамырдан бастап «Орталық алаң» аялдамасы арқылы жүретінін де атап өтті.
Ал көліктердің сыйымдылығына автобусты шығарушы «Daewoo Bus Kazakhstan» зауытының бас директоры Әсемхан Досқожанов: «Бұл автобустар үлкен класты көліктер қатарына жатады, ұзындығы 11 метр, 22 орынға негізделген. Автобус тасымалдаушы компаниямен келісім жасасу арқылы арнайы дайындалғанын айта кетейін. Сапалы әрі ыңғайлы отандық өнім, жаңа автобус халықтың да көңлінен шығады деп ойлаймыз. Болашақта қала үшін тағы 80 автобус дайындау жоспарымызда бар»,- деп атап өтті.
Жаңадан берілген автобустардың үлкен класты көліктер қатарына жататыны көңілге қуаныш ұялатады. Себебі алдағы уақытта шағын автобустар («Газельдер») жолаушыларға қызмет етуден шеттетіледі.
- Қоғамдық көліктер қозғалысын оңтайландыру ісі аяқталды. Енді шағын автобустарды жолаушыларға қызмет етуден шеттетеміз. Қалада 126 шағын автобус бар. Олардың орнын орта және үлкен класты автобустар алмастырмақ,- деді Ермак Бидахметұлы.
- 2017 жылы 9 ай бойы жолаушылар көлігін оңтайландыру процесі жүрді. Жолаушылар саны анықталды, әрбір аялдамаға зерттеу жүргізілді, яғни көлік инфрақұрылымы толықтай зерделенді. Қазір жаңа маршруттық жүйе қалыптастырдық. Ол бойынша 39 маршрут болады. Шағын көліктер алынып тасталып, тек Жаңа құрылыс пен 19-подстанцияны жалғайтын №54 бағытта шағын көліктер жүрмек,- деген Семей қаласының жолаушылар көлігі және автомобиль жолдары бөлімінің жолаушылар көлігі секторының меңгерушісі Назым Жамболатова тағы бір жаңалық - өзге қалалардың, елдердің тәжірибесіне сүйене отырып, «Ыңғайлы маршрут» жобасы қарастырылып жатқанын, жоба ыңғайлы болатын болса, Астана, Алматы қалаларындағы сияқты электронды билет енгізілуі мүмкін екенін жеткізді.

Әйгерім СӘРСЕНҚАЛИ

 

БЕЙБІТ ЕЛДІҢ БЕРЕКЕСІ БІРЛІКТЕ

1 Мамыр – Қазақстан халқының бірлігі күні қаламызда жоғары деңгейде аталып өтті. Қазақстан атты бір шаңырақ астына топтасқан ұлттар мен ұлыстардың өкілдері шаһарымыздағы Орталық алаңға жиылып, достық пен татулықтың үлгісін көрсетті. Мерекелік салтанатты жиында әр халық әні мен биінен шашу шашып, қолөнер бұйымдарын паш етіп, ұлттық тағамдарын ұсынды һәм өзіндік ерекшеліктерін көрсетті. Сонымен қоса бұл күні, қазақы дәстүрге сай, Қымызмұрындық салты, «Рухани жаңғыру» тақырыбы аясында көрме, ұлттық спорт түрлерінен сайыстар ұйымдастырылды.

Мереке қала әкімі Ермак Сәлімовтің құттықтау сөзінен бастау алды: 

- 1 Мамыр – әрбір қазақстандық үшін Отанға деген махаббаттың, азаматтық борыш пен жалпыұлттық келісімнің мерекесі. Бірліктің арқасында біз бейбіт ғұмыр кешудеміз. Қаламызда 80-нен астам ұлт пен ұлыстың өкілдері ынтымақ пен бірлікте өмір сүріп жатыр, Достық үйі жұмыс істеп тұр. Онда 22 ұлттық мәдени орталық қызмет жасауда. Елбасы Н.Ә.Назарбаевтың «Мәңгілік Ел» ұлттық идеясының негізін құрайтын бірлік пен түсіністік, қарапайым сыйластық орын алған жерде қашанда іс нәтижелі болатыны белгілі. Қазақстан халқы Ассамблеясының қызметі барша ұлт өкілдерінің мәдениетін дамытуға, ана тілін, салт-дәстүрлерін сақтауға негізделген. Қазақстан халқы Ассамблеясының 26-шы сессиясында Елбасы: «Халықтың бірлігі - жаңарған Қазақстанды өркендетудің басты шарты. Солай болған және солай бола бермек»,- деп атап өтті. Ардақты ағайын, бүгінгі мерекемен шын жүректен құттықтай отырып, баршаңызға зор денсаулық, отбасыларыңызға құт-береке, бақыт тілеймін,- деді Ермак Бидахметұлы.
Қала әкімінің құттықтау сөзінен соң сахна төріне көтерілген әртүрлі ұлт пен ұлыстың өкілі ұлттық киімдері мен ұлттық өнерлерін ортаға салды. Сонымен қоса өзіндік ерекшеліктерге толы қолөнер бұйымдарын да таныстырды. Көрмеге, этномәдени орталықтармен бірге, «Рухани жаңғыру» тақырыбында еңбектенген балабақша ұжымдары да қатысты.
- Татар өнер мектебінде оқушылар қолөнер бұйымдарымен айналысады. Оның ішінде классикалық және татар өнері бағыттары бойынша үйретеміз. Шыны, керамика, бисермен сәндеу жұмыстарын және басқа да бұйымдарды көрмеге қойдық. Көрмеміз арқылы елімізде ғана емес, алыс-жақын шетелдерде де татар мәдениетін таныстырып жүрміз,- деген өнер мектебінің ұстазы Рая Масаева мерекеге орай пікірін де білдірді:
- Бүгінгі мерекенің маңызы ерекше. Себебі біз 130 ұлт пен ұлыстың өкілдеріне мекен болған елде өмір сүріп жатырмыз. Оның үстіне Семей қаласы – еліміздің рухани орталығы. Мұнда әртүрлі ұлт өкілдері бір атаның баласындай ғұмыр кешуде.
Орталық алаңдағы мерекені әсем әуенімен әрлеген ұжымдар да болды. №11 ясли-балабақша ұжымының орындауындағы халық әнін ұйып тыңдамағандар кемде–кем.
- Тәрбиешілердің туындылары және қолөнер бұйымдары көрмеден көрініс тауып отыр. Музыка жетекшісі мен тәрбиешілерден құралған ансамбль халық әндерін орындап, мерекелік көңіл-күй сыйлауға тырысуда,- деді №11 ясли-балабақшаның музыка жетекшісі Гаухар Жұмағалиқызы.
Дастарқан жайылып, әрбір ұлт өзінің тағамдарын таныстырды. Сонымен қоса қазақы дәстүрмен Қымызмұрындық ұйымдастырылып, қала тұрғындарына 500 литр қымыз тегін берілді.
- Қымызмұрындық - ата-бабаларымыздан мирас болып қалған салт-дәстүріміздің бірі. Ертеректе аталарымыз бие сауғанда, алғашқы саумал қымызға көрші - қолаң, ағайын - туыс, ауылдастарын шақырып, барлығы ақтан ауыз тиген. Бұл мереке - сол бабалар бастамасының жалғасы,- деп, қымызын сапырып, тостағанға құйып тұрғындарға ұсынып тұрған Балкүміс Ысқаққызы қымыздың түрлері жайлы да айта отырды.
Шара қалалық өнер ұжымдарының мерекелік концертіне жалғасып, спорттық сайыстар ұйымдастырылды.
Айта кетейік, мереке күні Орталық демалыс саябағында «Берекелі, бейбіт ел» атты мерекелік концерт, Абай атындағы театрда қала әкімінің кубогы үшін республикалық «Жайдарман» ойындары да өтті.

Әйгерім СӘРСЕНҚАЛИ

СЕМЕЙ СПОРТЫНЫҢ ДАМУЫ ҚАЛАЙ?

Осы аптаның басында қалалық әкімдікте өңірдегі спорт саласының дамуы, бүгінгі жай –күйі, өзекті мәселелеріне арналған алқалы жиын өтті. Оған Семей қаласының әкімі Ермак Сәлімов, қалалық мәслихат хатшысы Бейсенбек Ақжалов, спорт ардагерлері, спорттық мекемелердің басшылары қатысты. Семей қаласының дене шынықтыру және спорт бөлімінің басшысы Мұрат Құржықаевтың баяндамасы тыңдалды.

Аталмыш бөлім басшысы баяндамасында бұқаралық спорттың дамуы жақсы жолға қойылғанын айтып, бұл ретте Семейде салауатты өмір салтын ұстанатындардың саны жыл сайын артып келе жатқанына тоқталды. Спортты серік еткендер үшін қалаған спорттың түрімен айналысуына бөлім тарапынан барша жағдай жасалып отырғанын жеткізді. Осы саланы дамытуға жыл сайын бөлінетін қаражат көлемі де ұлғайып келеді екен. Мәселен, өткен жылы осы мақсатқа 52 млн. теңге бөлінсе, биыл 4 млн. теңгеге артып отыр. Қазір Семей қаласы мен қалаға қарасты ауылдарда 380-нен астам спорттық мекемелер қызмет көрсетеді. Семейде жекеменшік спорттық нысандардың да жұмысы жақсы жолға қойылған. Оған қаладағы кәсіпкерлер де үлес қосып келеді. Бұл ретте Шығыс Қазақстан облыстық мәслихатының депутаты Нұрлан Омаров, Ғаббас Ибраевтар қарауындағы кәсіпорын жұмысшыларына салып берген спорттық нысандарын айрықша айтуға болады.
Облыс әкімі Даниал Ахметовтің тікелей тапсырмасымен ашылған Спорт академиясының шәкірттері бұл күнде қоржынға жүлде салып жүр. Сонымен қатар Мұрат Құржықаев ауылдарға волейбол, баскетбол, футбол, күрес және бокс жаттықтырушылары бөлініп, қазір ауылдың қара домалақтары, қаладағы құрдастарымен қатар, түрлі спорттық жарысқа қатысуға мүмкіндік алғанын атап өтті.
Айтпақшы, 12 мамыр күні Семейде «Қазақстан Барысына» іріктеу өтеді. Шығыстағы Шалқар, Айбек, Мұхиттың ізін жалғайтын апайтөс, атан жілік балуандардың барлығы бақ сынайды деп күтілуде. Бөлім басшысы сонымен қатар биылғы жылы семейлік спорт саңлақтары қатысатын қалалық, облыстық және республикалық деңгейде қандай жарыстар өтетінін толық айтып шықты.
Жиналғандар бүгінгі спорттың жай-күйіне, дамуына байланысты пікір білдіріп, өздерінің ұсыныс – тілектерін ортаға салды. Жиын соңында қала әкімі Ермак Сәлімов: «Спортқа қатысты қандай да бір сауалдарыңыз болса, кез келген уақытта пікір алмасуға, ой бөлісуге әзірмін. Бәріміз бірлесе отырып шаһардың спорт саласын дамытуға үлес қосуымыз керек. Келісіп пішкен тон келте болмайды,- деп жиынды қорытындылады.

Серік ӘБІЛҚАСЫМҰЛЫ

 

ЖЕРГІЛІКТІ БЮДЖЕТ ЕСЕБІНЕН СУ ТАСҚЫНЫНЫҢ АЛДЫН АЛУ БАҒДАРЛАМАСЫ ҚҰРЫЛАДЫ

Шығыс Қазақстан облысының әкімі Даниал Ахметов бірқатар министрліктер құрастырған бағдарламаны мақсатсыз деп таныды. Мәселен, Ішкі істер, Ауыл шаруашылығы, Энергетика, сондай-ақ Инвестиция және даму министрліктері «Су тасқыны қаупінің алдын алу және оларды жою бойынша 2017 – 2020 жылдарға арналған шаралар кешені» жол картасына қол қойған. Алайда аймақ басшысы осы уақыт ішінде ауыз толтырып айтарлық істің жүрмегенін айтады. Бұдан бөлек оны жүзеге асыру үшін жергілікті бюджеттен қаражат қажет екен. Бұл уақытта өңірдің өзі мотопомптар мен өрт сөндіру баспалдақтарын алу үшін 500 миллион теңге бөліп отыр.

- 2020 жылға 2 млрд. 77 млн. теңге жоспарланған, рас па? Оған қаржы қайдан бөлінеді? – деп сұрады облыс әкімі Даниал Ахметов Табиғи ресурстар мен табиғат пайдалануды реттеу басқармасы басшысы Медет Нұрғалиевтың баяндамасын тоқтатып. - 1000 су киімі керек, бірақ бізде бары 5 пайыз ғана. Техникамен қамтамасыз ету деңгейі өте төмен. Биыл әкімдік тағы да 500 миллион теңге бөлді. Олай болса, бұл бағдарламаның қажеттілігі бар ма? Не үшін керек? – деп жалғастырды аймақ басшысы.
Өз кезегінде басқарма басшысы жол картасын жасау барысында бірнеше рет жергілікті бюджет мүмкіндіктерінің шектеулі екенін айтып, ұсыныс білдіргенін жеткізді.
Даниал Ахметов комиссия құрып, 2 айдың ішінде биыл болған су тасқыны негізінде егжей-тегжейлі «ШҚО жол картасын» жасауды тапсырды. Оның негізінде ведомстволық нысандарды қаржыландыру қарастырылмақ.
- Әкімдік ол бағдарламаға қол қойған жоқ. Құжаттарды көтеріп, тексеріңдер. Бәрі бір ауыздан «жергілікті бюджет төлесін» дейді. Егер жергілікті бюджет болса, онда министрліктерсіз-ақ өз бағдарламамызды құрастырамыз,- деді ШҚО басшысы.
Даниал Ахметов сонымен қатар ТЖ басқармасына көшпелі мотопомп, қуаттылығы сағатына 720 текше метр су соратын 4 мотопомп және Өскемен мен Семейге 2 биік өрт сөндіру баспалдағын алу үшін қосымша 500 миллион теңге бөлу туралы тапсырма берді. Аймақ басшысы әкімдік тарапынан көмек болатынын, тек ІІМ, оның ішінде ТЖК де белсенділік танытуы тиіс екенін тілге тиек етті.
Айта кету керек, келесі жылдан бастап өзендердегі қауіпті жерлерде мұзды алдын ала жару жұмыстары жүргізілмек.

ШҚО әкімінің баспасөз қызметі.

 

 

АЛТЫН СОҒУ ТЕХНОЛОГИЯСЫ ӘЛЕМНІҢ ЕШБІР ЕЛІНДЕ БОЛМАҒАН

Шығыс Қазақстан облысының әкімі Даниал Ахметов Қазақстандағы Францияның Төтенше және Өкілетті Елшісі Филипп Мартинэмен кездесті.

Аймақ басшысы Елшіге өңірдің өндіріс саласындағы әлеуеті туралы айтты. Бүгінде облыстағы ірі өнеркәсіп ошақтарының өнімі тек Қазақстанда ғана емес, сонымен қатар әлем бойынша жоғары сұранысқа ие. Даниал Ахметов, бұдан бөлек, ел тарихына тоқталып, жаздыгүні Филипп Мартинэні киелі орындарды, атап айтқанда Берелдегі Патшалар алқабын және Зайсан ауданындағы Шілікті қорғанын аралауға шақырды. Әкім сондай-ақ ата қоныста, яғни Шығыс Қазақстанда, б.з.д. VII ғасырда бабалардың бірегей металлургиялық технологиясы болғанын ерекше атап өтті. Сондай-ақ алдағы таңда б.з.д. VII және IV ғасырларда болған «зауыттардың» өзі де табылуы ықтимал деген үміттің барын жеткізді.
- Біз ұлттық мәдениетімізбен мақтанамыз. Көпшілік біздің халықтың көшпелі тұрмысы үлкен мүмкіндіктерге жол ашпаған деп ойлайды. Алайда бүгінде белгілі дүние - біздің заманымызға дейінгі VII ғасырда Шығыс Қазақстанда ата-бабаларымыз бірегей металлургиялық технологияны игерген. Әлемнің ешбір елінде ол уақытта, яғни б.з.д. VII ғасырда, алтынды соғу технологиясы болған емес. Өткен жылдары үлкен көлемде артефакт қазып алдық. Сол зергерлік бұйымдар мен қару-жарақтар ата-бабаларымызда болған жоғары металлургиялық мәдениетті айғақтайды. Сөзсіз, бұл осы күндерге дейін болған мемлекеттіліктің жоғары деңгейін көрсетеді,- деп атап өтті Даниал Ахметов.
Елшінің айтуынша, археология саласында серіктестік, оның ішінде Патшалар алқабы француздық эксперттер үшін үлкен қызығушылық туғызады. Өз кезегінде Филипп Мартинэ аймақ басшысының шақыруын қабыл алып, турист есебінде келетінін жеткізді. Кездесу барысында сондай-ақ өңірде француз тілін заманауи әдіс бойынша оқыту туралы келісім жасалды.

 

Меншік иесі: «Семей таңы – Вести Семей газеттері» ЖШС

Техникалық директор:Қайрат Жолобаев

Бас редактор: Ерзат Жанатұлы

           

Ескерту! Кез келген

материалды көшіру және жариялау

үшін редакцияның арнайы

рұқсатын алу қажет!

 

Телефон: 8-775-746-46-70,

8-707-372-57-00

Кеңсе тел.: 8-7222-52-36-57