ЕМХАНАНЫҢ ӘУРЕСІ

Біздің елімізде бірқатар медициналық қызмет тегін. Шыны керек, ақысыз медициналық көмектің шырғалаңы көп болып тұр. Өзгелерді қайдам, әйтеуір, өз басым осы уақытқа дейін тіркелген емханамнан жарытып ем ала алмадым. Жүгінгені былай тұрсын, ақ халатты абзал жандардың алдына жетудің өзі күш.

Тұрақты мекенжайым бойынша, №1 қалалық емханаға тіркелгенмін. (Оның алдында медбикелер тұрақты жұмысыңыз жоқ деп тіркемеді). Медициналық картамның өзі сол кезде біраз қиындықпен ашылған. Бірде дәрігер еңбек демалысында, бірде медбикелер жұмыс орнынан табылмады. Хош, мұның бәрін кездейсоқтық деп айтуға да болар.

Кезек арқылы дәрігердің қабылдауына кіру мүмкін еместін түсінген соң учаскелік терапевт дәрігерге күні бұрын жазылып қойдым. Оның алдында талай рет тауым шағылып қайтқаным есімде. Дегенмен бұл жолы да жолым болмады. Жазылған уақытымда дәрігер басқа науқасты қабылдап отыр екен. Медбикелер «күт» деп бұйырған соң, амалсыз тағы біраз күтуге тура келді. Алайда әр минуты санаулы басқа науқастар мені күтіп отыра ма? Менен кейін жазылғандар да алдымды орап кете барды. Арасында медбикелердің «пәленбаевтың» тегін атап шақырып алатын әдеті тағы бар.

Сонымен, белгіленген уақытым-нан кешігіп, дәрігердің қабылдауына кірдім. Енді медициналық картам жоқ болып шықты. Медбикелер емделушінің құжатын алдын ала тауып, әкеліп қоюы тиіс еді. Кімнің салғырттығынан картамның жоғалып кеткенін білмедім, бірақ сол күні тегін медициналық ем алудың қиындығына тағы көз жеткіздім. Терапевтен көз дәрігеріне жолдама ала қояйын деген үмітім ақталмады. Карта ашу үшін де бірнеше кабинеттің есігін тоздыруға тура келеді. Үйде бос отырған адам болмаса, оның бәріне уақыт қайда? Амал жоқ, тағы да ақылы медициналық қызметтің көмегіне жүгінуге тура келді. Оның үстіне аталған ауруханада офтольмолог та тапшы болып шықты. Консультациялық кеңес алу үшін дәрігердің қабылдануына ай бұрын жазылу керек екен.  

Мұндай жағдайлардың бір емес, бірнеше рет қайталануы қолыма еріксіз қалам алдырып отыр. Студенттік жылдары да №5 емхананың талай әуре-сарсаңын көрген едік. Мен дәрігерлердің кәсіби қызметіне сын айтудан аулақпын. Тек олардың алдына жетудің біз үшін машақат екенін жеткізгім келеді. Ақ халатты абзал жандар мен медбикелер ем алушыларға дұрыс бағдар көрсетіп, өздерінің де, науқастардың да уақытын бағалауды үйренсе екен. Әркім өз жұмысына жауапкершілікпен қарап, қызметтік этиканы сақтай білсе, кім біледі, алдағы уақытта дамыған 30 елдің қатарына қосылып қалармыз?!

Жадыра ТӨЛЕГЕНҚЫЗЫ

Пікір қосу


Қорғау коды
Жаңарту

Меншік иесі: «Семей таңы – Вести Семей газеттері» ЖШС

Техникалық директор:Қайрат Жолобаев

Бас редактор: Ерзат Жанатұлы

           

Ескерту! Кез келген

материалды көшіру және жариялау

үшін редакцияның арнайы

рұқсатын алу қажет!

 

Телефон: 8-775-746-46-70,

8-707-372-57-00

Кеңсе тел.: 8-7222-52-36-57